Den varios comunicadonan mi a bin ta mustra riba e situacion alarmante cu tin na e dump na Parkietenbos y Sero Teishi. Aparte di un paar di habitante cu ta protesta ta parce cu e mundo politico, comercial, sindical y te hasta un paar di medionan di comunicacion, no ta interesa den kico e habitantenan e barionan aki mester keda soporta.
Mi no lo cansa di keda mustra riba e situacion alarmante aki cu articulonan y cu potretnan, pa mustra e realidad cu e pueblo aki ta biba aden diariamente. Por bay bisa cu mi persona ta un “dinosaurio” y hasta ta insinua cu mi no ta papia berdad, pero mi consenshi ta limpi y mihó “dinosaurio” cu marioneta di mandatario(nan) cu “nos no ta nan” y den realidad ta pio cu “nan”. Ta sigui promove mentira y demonstra desprecio pa bida di ser humano.
Potret no sa gaña. Mi a bisa for di un principio cu e incinerator chikito ta un “PORKERIA” y cu e ta un “MISKOOP”. Nunca minister Arends por a mustra cu loke mi ta trece padilanti ta sea bieuw of “achterhaald”! Ta ‘pesey nos ta ilustra tur nos ponencianan cu prueba of cu potretnan.
Y pesey e biaha aki, un biaha mas mi kier ilustra cu prueba con di un banda minister Arends y e Minister Presidente Eveline Croes ta gaña.
Dia 22 di juli 2022 den un conferencia di prensa minister Arends a bisa cu e incinerator tin simannan NO ta trahando pa motibo cu NO tin filter y esey ta peligroso pa bida di hende! Wel ata un potret saca dia 20 di juli 2022. E incinerator tabata trahando!
Dia 15 di september 2022 den tratamento di presupuesto di DOW den Parlamento, e Minister Presidente Eveline Croes a bisa cu e incinerator chikito NO tabata traha entre 26 di augustus te cu 7 di september. Adhunto un otro potret cu ta mustra cu dia 27 di augustus 2022 e incinerator tabata trahando! Otro mentira! Y den ambos caso SIN filter nobo, loke ta mustra cu esaki ta un acto criminal contra e pueblo di Parkietenbos y vecindario.
Pues e Minister Presidente Croes y e vice Minister Presidente Arends riba mesun incinerator ta simpel sinta gaña cu un cara seco!
Te ki dia ta keda acepta esaki? Nos mester keda acepta e mentiranan di e gobierno aki y particularmente di e minister concerni sr. Ursell Arends cs? Mi por ta un dinosaurio pasó mi tin hopi aña den politica, sinembargo esey hamas lo stroba mi trece informacion corecto y cu sigur NO ta “achterhaald” ni tampoco ta bieuw! Ta e realidad cu e pueblo di Parkietenbos ta biba aden diariamente!
