Presidente di Parlamento di Kòrsou, sra. Charetti America – Francisca, a realisá un bishita di kortesía serka Presidente di Tweede Kamer. sra. Vera Bergkamp.
Ambos a ser skohe na 2021 pa fungi komo presidente di e organo ku ta representá pueblo. Den e kombersashon nan a elaborá entre otro riba e tema di koperashon mutuo entre e dos institutonan.
Aktualmente Parlamento Hulandes ta kanando un trayekto di fortifikashon di e funshonnan di e instituto. Den e kuadro ei na 2021 a instalá un grupo di trabou ku a saka e rapòrt ku ta karga e título “Versterking functies Tweede Kamer, meer dan de som der delen” den kual ta duna algun rekomendashonnan práktiko pa mehorá e funshon legislativo, representativo i di kontròl di Tweede Kamer.
E eksperensianan di e rapòrt ta keda kompartí ku Parlamento di Kòrsou. Tambe a para ketu na e tema di kódigo di komportashon pa miembronan di Parlamento, fortifikashon di demokrasia i e pasado di sklabitut i su efektonan.
Ambos presidente a ekspresá nan apresio pa e forma ameno ku a hiba e kombersashon i lo sigui den kontakto. E kombinashon di potrèt ta pa kortesía di Jeroen van der Meyde.
