Despues di 2 aña den forma virtual a celebra esaki den persona debidamente
Dia Mundial di Turismo ta wordo celebra riba 27 di september tur aña y en conexion cu esaki, A.T.A. a organisa su conferencia anual un biaha mas, e biaha aki den persona, den presencia di mas di 300 persona, despues di 2 aña cu el a ser efectua den forma virtual.
Dia Mundial di Turismo ta un ocasion special unda Aruba Tourism Authority ta tuma e oportunidad pa conscientisa comunidad riba e importancia di e industria pa nos pais y celebra e individuonan cu ta traha den turismo.
‘Rethinking tourism’, ta e tema cu Organisacion Mundial di Turismo a scoge e aña aki, considerando cu e sector ta recuperando mundialmente y mester bay anilisa den ki direccion kier bay como destino turistico.
E conferencia a conta cu presencia di varios miembro di Parlamento di Aruba, Minister President, Minister di Turismo y Salud Publico y Minister di Educacion y Deporte como tambe miembronan di Hunta di directiva di A.T.A., CEO di AHATA, CEO di AAA, CEO di APA, Presidente di ATSA y socionan den e industria. Adicionalmente, e conferencia tawata e sesion di apertura oficial pa e Conferencia di ‘Aruba Meets Europe’, cu a trece tur socio clave y hopi nobo na nos isla e siman aki, pa cual A.T.A. tin un programa completo prepara pa nan. Manera custumber studiantenan di e unidad di Hospitalidad di EPI y di e facultad di Turismo di Universidad di Aruba tambe tawata presente. Tur acompaña pa e ekipo di A.T.A. Aruba. Edjean Semeleer a fungi como Maestro di Ceremonia y a deleita e participantenan cu musica di Aruba, acompaña pa Chris Kross. Mester bisa cu durante di e dia di celebracion, A.T.A. a dedica atencion separa na e industria di turismo crucero pa medio di otro edicion di “Cruise Symposium Aruba” cual a tuma lugar despues di e celebracion ariba menciona.
Durante e transcurso di e mainta Minister Oduber y Ronella Croes CEO di A.T.A. a hiba palabra, sigui pa Max Pinas y Julius van Leeuwen di ‘DEPT Agency’, un di e agencianan internacional cu A.T.A. ta traha cu n’e. Bunita pa menciona ta cu Max a nace na Aruba y Julius a crece kinan, pues ambos tin un conexion cu nos isla, y pesey mes a wordo scogi pa comparti nan expertisio y inspira.
Como parti di su presentacion, Ronella a menciona cu un di e elementonan cu mas a resalta durante e pandemia como tambe den periodo di recuperacion ta e resiliencia cu nos tin como un nacion. Esaki ta un elemento di Aruba su DNA y esaki tawata e compas cu a guia nos durante e crisis. Nos recuperacion tawata posibel a traves di e resiliencia ey combina cu trabao duro y esfuerso di socionan den sector publico y sector priva y sigur tambe e apoyo di nos comunidad.
Den liña cu e tema; ‘rethinking tourism’, A.T.A. lo sigui pensa y adapta esfuersonan dirigi riba bienestar di nos industria, nos isla y nos hendenan.
Un danki special na tur persona cu ta traha sea directamente of indirectamente den turismo. Danki pa aporta na e pilar di nos economia, danki pa hiba nos isla dilanti. Na e ekipo di A.T.A na Aruba pero tambe na Norte America, Latino America y Europa, danki pa boso pasion pa nos isla y su bienestar.
Feliz Dia Mundial di Turismo 2022!
