Na Deventer e pintor Arubiano, Gustave Nouel (www.gustavenouel.nl), ultimo añanan a train ‘street painters’ na kunstcentrum Kunstcircuit, asosiashon di artista DAK y na su atelier. Tin un coöperacion harmonioso cu diferente organizacion cultural y iniciativa artistico den region. Na 2020, coöperando cu MKB, un ‘Montmartre di Deventer’ bou di guia di Gustave lo a kuminsa na centro comercial De Boreel. Pero Covid no a permiti esaki te ainda… E ‘artistanan’ cu e Arubiano ta guiando, ta participa na hopi actividad cultural y esaki ta birando parti structural di cultura na Deventer.
Recientemente tabatin na Deventer un Mini-Montmartre na un festival celebrando anniversario di ateliers ‘De Plataan’. ‘Cultuur-wethouder’, Ilse Buursma, a bisa den su discurso cu e ateliernan aki cu gobierno a laga traha diez aña pasa pa artista profesional ‘importante’, te ainda ta entre e miho ateliers na Hulanda. E Arubiano Gustave cu tambe tin un atelier na ‘De Plataan’ a sketch e wethouder durante su discurso y entrega esaki den nomber di tur artista di ‘De Plataan’. Na e festival ademas di diferente actividad cultural creativo y show di baile, tabatin un Mini-Montmartre caminda Gustave y otro artistanan tabatin e oportunidad pa hasi publico contento cu ‘street portraits’. ‘Street portraits’ ta birando parti di cultura local. (Manera na Paris, Madrid, New York, etcetera )
Representando Kunstcircuit, Gustave a duna workshop di ‘Street Painting’ na Sint Maarten pa artista di tur nivel, culminando cu un mural colectivo na Belair Beach Hotel. NIA (National Institute of Arts) y Belair Beach Hotel a sponsor esaki. Na Sint Maarten meta di Gustave (cu ta ser considera un di e pintornan mas reconosi di Caribe cu ta biba na Hulanda) tabata pa stimula un intercambio cultural entre NIA y Kunstcircuit, cu lockdown no a permiti na 2020.
Cuminsamento di oktober, directora di NIA, Arlene Halley tambe lo bishita Kunstcircuit pa palabra e prome intercambio na april 2023, cu Deventer y region. Directora di NIA ta un bailarina cu hopi experencia internacional, cu lo duna workshop y masterclass, dia 3 y 4 di oktober na Deventer.
Intencion ta, cu ademas di arte visual y baile, tambe musica, teatro, literatura y/o mas disciplina di arte lo por ta parti di un intercambio cultural, cada dos aña. Si e pilot cu Sint Maarten na 2023 ta exitoso, un intercambio cultural cu Aruba tambe lo ta un posibilidad, na april 2024. Organisacion di Oranje tambe ta apoya e ‘grassroot’ intercambio cultural aki, den nos mes un Reino.
