Laga nos tene bon cuenta cu e palabra di Dios no ta scirbi solamente pa nos informacion, pero pa nos salbacion y transformacion.
E problema di mas grandi cu nos tin awendia, no ta criminalidad, inmoralidad,droga etc, pero e falta di respet pa Dios y su palabra ta e causante di tur maldad.
Ora hende no ta respeta Dios ta facil pa diabel tuma over den nan bida, y dirigi nan bida, y hopi hende no ta compronde cu e motibo cu nan tin stress, depresion, y hasta amargura den nan bida, ta pasobra nan no tin respet pa Dios.
Tin hopi hende ta cana completamente contra e boluntad di Dios, faltando cu su palabra, principio y boluntad y ta bisa cu nan ta feliz, pasobra nan ta feliz den scuridad, y e enemigo a haci nan ciego, pa nan no sali for di locual cu nan ta (Juan 3:19+20).
Hopi ta lubida cu ta Dios a crea nos:
Dios merece nos adoracion ( Rev 4:11)
Dios ta duna nos sabiduria ( Salmo 111:10)
Dios lo huzga nos ( Mateo 25:41).
Dios ta amor ( 1 Juan 4:8).
Nos respet ta agrada Dios ( Efesios 6:2-3)
Nos mester respeta tur hende.(1 Pedro 2:17).
Esun cu ta respeta Dios, ta obedece Dios.( Santiago 4:7).
Pasobra ta para scirbi :Manera mi ta biba, Señor ta bisa, tur rudia lo dobla pa Mi, y tur lenga lo duna alabansa na Dios.(Romanonan 14:11).
Ora nos sa masha bon cu nos ta falta respet na Dios, door di nos actitud, manera di papia, manera di biba, kier sigi den nos maldad aunke nos sa bon, bon cu nos ta haciendo malo, nos ta bibando den rebeldia , y den peligro henter dia pasobra si morto mester presenta si nos no arepenti y bini na Señor nos destino lo ta fierno.
E palabra di Dios ta bisa den Galationan capitulo 6:7 cu tur locual un hende sembra e lo cosecha, pero toch tin hende ta sigi haci bofon, y tin otronan ta sigi apoyanan, y purba tur manera pa complace cu maldad, pero tambe creando un generacion cu no ta obedece Dios.
Hende ta tira falta riba tur situacion pafo di cas, pero ta lubida cu pa falta di respet pa Dios, cos no ta bay bon den cas.
Ora un persona ta den adulterio of cualquier tipo di inmoralidad, tin pleito den su cas, pasobra e homber/muher a perde respet pa Dios.
Dios a destrui mundo den Genesis Capitulo 6 +7 pa motibo di falta di respet y maldad.
Dios a destrui Sodoma y Gomorra pa motibo di inmoralidad y falta di respet.
Nos mester lanta nos yuinan cu respet pa Dios, guiando nan den e caminda di Cristo, kende ta E luz berdadero pa nos bida.
Asina cu den un cas no tin respet pa Dios, henter e famia ta sufri e consecuencia, pasobra nan no tin coneccion cu Dios, y e enemigo ta haci fiesta.
Ora bo tende vocabulario di cierto hoben , mesora bo ta bin compronde cu no tin respet pa Dios, y esaki a conduci na e dolor inmenso cu nan mayornan ta pasa aden.
Ora no tin respet pa Dios, portanan ta sera y amistadnan ta bay perdi, pasobra respet pa Dios mester bini na prome lugar.
Un hende no por ta integro,si e no tin respet pa Dios y su palabra.
E respet pa Dios ta mas importe pa nos cu tur cos.