Na Marriot Ballroom a tuma luga un momento special cu Aruba Tourism Authority (ATA) y Comite Olimpico Arubano (COA). Despues di hopi tempo di dialogo entre ATA y Comite Olimpico Arubano (COA ) a yega e momento pa firma un acuerdo formal y drenta den un asociacion formal cu Comite Olimpico Arubano (COA ).
CEO di ATA Ronella Croes a hiba palabra y ta duna di conoce cu no ta un secreto cu un di e maneranan di promove Aruba ta pa medio di deporte, pero sigur na momento cu mira e area di deporte den su totalidad cu ta hopi special pa Aruba, pero tambe pa turismo.Tin hopi peticion cu ta yega cerca ATA pa contribucion y esaki ta un reto sigur pa ATA pa dicidi unda ta miho pa contribui y unda no cu ta ilustra di kico ta e maneho pa contribucion.
Segun CEO di ATA un di e maneranan cu ATA por contribui na posiciona Aruba debidamente ta pa medio di asociacion aki cu tin tur Aruba su atletanan cu ta wordo prepara pa competi internacionalmente incluso evidentemente esunnan cu logra ta esunnan cu ta bay riba e plataforma maximo di deporte cu ta weganan olimpico mundial.
Pa ATA esaki ta e manera perfecto pa por duna contribucion y granito na deporte y na creacion di talentonan y promocion di Aruba internacionalmente. E acuerdo cu a keda firma ta uno cu a traha riba dje pa hopi tempo caba. Sinembargo loke cu ta hopi cla ta cu un asociacion no ta solamente pa un tempo cortico pero pa un tempo largo y asina hunto a delibera kico ta e miho manera.
E rekisito di e deliberacion aki ta di Aruba Tourism Authority (ATA) ta bay na yuda cultiva y prepara e atletanan pa asina nan por lusi debidamente internacionalmente. Sinembargo ATA a contribui caba den pasado den un manera special unda cu a ATA a percura pa diseña e uniformnan cu e atletanan a luci na aña 2016.
E parti aki tambe tabata un bunita colaboracion y e atletanan por a luci cu nan diseño nobo internacionalmente y di e manera ey a promove Aruba tambe. Tambe durante añanan ATA a contribui cu diferente eventonan di deporte di diferente manera. Sinembargo awo a scoge pa un maneho pa inclui e asociacion y ATA ta hopi orguyoso di mira con Comite Olimpico Arubano (COA) ta bin ta carga nan responsabilidad unda cu nan ta un partido hopi serio y ta mira resultadonan y avancenan den mundo deportivo.
CEO di ATA Ronella Croes ta gradici Comite Olimpico Arubano (COA) pa e pasenshi, cooperacion te na e momentonan aki y ATA ta hopi orguyoso di por yega na e momento aki y por medio di turismo tambe reconoce e importancia di e atletanan y reconoce cu e ta un promocion grandi pa nos pais internacionalmente den diferente mercado plataforma.
Wanda Broeksema ta presidente di Comite Olimpico Arubano (COA) y tambe a hiba palabra na e conferencia di prensa, pa COA awe ta un dia hopi importante y esaki ta e momento perfecto cu e firmamento a tuma luga. Actualmente Comite Olimpico Arubano (COA) tin un directiva nobo y completamente diferente.
Pa dos aña largo ya caba Comite Olimpico Arubano (COA) ta sinta na mesa ta papia cu ATA pa mira kico por haci hunto y kico Comite Olimpico Arubano (COA) por significa pa ATA pa eleva e deporte na Aruba. Sinembargo COVID a yega Aruba y no por a haci nada, pero awor cu Aruba ta recuperando poco poco ATA a reconoce e plan di Comite Olimpico Arubano (COA) y ta kere den esaki tambe.
Comite Olimpico Arubano (COA) y ATA a firma un colaboracion como parthnership unda cada partido lo gana di esaki. Nicol Hoeverts ta secretaria general di COA tambe a hiba palabra y ta hopi agradecido cu e parthnership aki,na unda cu tanto ATA y COA ta dos organisacion cu ta kere den excelencia , promove y haci miho di locual cu ya caba ta wordo haci. COA no ta solamente un organisacion deportivo, pero ta un organisacion cu ta purba di crea un miho sociedad , miho sernan humano atrabes di deporte.
