Un dushi dia yen di sabiduria den nos alegria pa nos tur ! Y cu hopi actividad y of movecion , e mundo ta sigui lorra ketobay. Nos tur cu tin nos dianan bon y menos bon. Nos dianan ocupa of suave, nos dianan tristo of alegre. Lady Ruth y su esposo Johan a bishita un bunita lugar recientemente, den curason di Piedra Plat, of den vocabulario moderno “Flatstone City” pa a disfruta di un comchi soppi , “erwten soep” cu un sandwich di galinja sate cu su dushi saus di pinda. Nos a ripara un “make over”, un cambio bunita cu cuadranan na muraya, cuadranan masha bunita mes di casnan rubiano biew. Bunita ta, cu ta, e donjo mes di e lugar aki, sr. Franklin Bareno a pinta tur e cuadranan durante varios anja bau di su nomber artistico “Fanky”. Ki bunita e cuadranan aki ta luci den e coffee place ey den e parti na banda di Bright Bakery den curason di Piedra Plat. Nos a wordo sirbi pa dos hoben adulto den un forma excelente ! Nos ta gusta nos “uitje” di bay bebe koffie y regularmente nos ta bishita Coffee House , y awor nos conose algun otro lugar mas di koffie, pasobra, nan ta lanta manera paddestoel tur caminda. Como penshonado claro nos ta wak unda ta mas barata pero dushi toch.
Riba facebook bo ta lesa pa nos como rubiano sostene nos negoshinan local, pero tin negoshinan cu donjonan di exterior cu ta biba ya pa anjas riba nos isla, y nan tambe ta integra y sinti nan mes local cu amor y gradicimento na nan curason pa a hanja nan segundo cas aki, riba nos isla . Nan tambe ta traha duro y yuda hiba nos isla padilanti. Nan tambe ta stima Aruba.
Manera Artistic Boutique Aruba banda di e parkinglot di Windcreek Casino Hotel, na unda nos a shop y cumpra varios tafellakens masha masha bunita mes, anto cu rebaho di 50 y 70 %. Lady Ruth a probecha di a cumpra tambe algun joyas di stainless steel pa su nieta y nietonan teenagers.
E grandioso baratillo aki ta going on ketobay den full swing. Aruba ta un isla chikito den tamanjo pero si grandi di curason. Tin biaha bo ta busca algo specifico pa bisti of pa cas y bo no ta hanjele y tin cu tin e manera y capacidad di ordo e for di Merca, amazon ofzo. Un biaha nos tawata en busca di un tas color sinishi y ta te serca un di e shopnan Hindu den Caya Betico bandi Djiespies Place nos a bin hanja, despues di a cana henter caya drenta tur tur e negoshinan. Nos tambe ta haja falta ketobay di La Linda, pero danki Dios tin La Moderna ainda na unda nos bon amigo Benjie Pick mes ta atende’bo cu hopi amor y carino. Cu un bearhug pa su bunita sra.esposa Bonnie tambe y nan precioso yuinan grandi caba.Y ora e smak tey, Lady Ruth ta gusta “window shopping” tambe y ta keiro di negoshi pa negoshi y toch ta bin cas bek cu “algo”. Sea un blusa of un tshirt pa su casa. Y tin biaha ta pasa cumpra un dushi juice di tamarijn na Djiespies Place.
Lady Ruth ta den preparacion pa su bunita One woman show “Alegria di Ruthy 3″ recordando nos lectornan cu a wak e prome y di dos show, pa no falta esaki ! E ta bay ta hopi bunita ! Si por, cumpra bo ticket tempran y wardele den bo cartera pa dia 14 di December venidero pa 8 pm den Cas di Cultura. E entrada na benta di tickets ta pa Animal Shelter. Y nan tin un bunita Dog Show na luna di Oktober, si mi ta corda, dia 30 di Oktober, of yama nan pa confirma e fecha, ora y lugar.Mientrastanto nos ta sigui canta den banjo, training pa mi show. Danki pa e bon comentarionan ricibi pa cu mi tema di show di e anja aki :” Holland-Aruba-Love with a touch of Christmas ! Si, nos amor pa madre Patria Hulanda y nos dushi isla, cu un bunita y dushi toke di Pascu lo bay resalta y impacta ariba e stage den Cas di Cultura diaranzon dia 14 di December 2022 ! Danki pa lesa nos relato, stay safe, Love you too !
