Corte Comun di Husticia (Hof) a condena e sospechoso di un tiroteo riba 21 di januari, 2018 na truk di pan Palu Blanku pa asesinato di e coki y di forma unanime a impone un castigo di prizon mas halto di loke e sospechoso a haya den Corte di Prome Instancia.
Corte den Prome Instancia a impone un castigo di 15 aña. Pero Hof a conclui cu un castigo d 17 aña y seis luna ta mas na su luga pa un delito asina serio manera esaki.
Hof a husga cu e sospechoso a haci su mes culpabel pa asesinato premedita riba e coki.
El a bay anochi laat na e truck di pan unda cu e victima, un conoci di dje, tabata traha. Eynan a surgi un discusion entre e dosnan aki, unda cu e sospechoso e menasa e victima diferente biaha verbalmente, cu morto.
E sospechoso a bay for di e sitio, a cambia di paña y algun rato despues a bolbe na e truck di pan cu su cara tapa y bon arma.
Cu arma di candela den man, e sospechoso tabata grita e hendenan presente “hala, hala”, y a core bay direccion di e victima cu tabata den e truck di pan. Mesora cu el a yega cerca, a los tres tiro sigui riba e trahado. E tironan tabata fatal y e victima a fayece na e sitio mes.
Durante tratamento di e caso, e acusado a admiti cu mas tempran e anochi ey el a hay’e den un discusion cu e victima, pero ta nenga cu e tabata esun cu a los e tironan fatal. Dos testigo ocular a señala e sospechoso aki como esun cu a los e tironan fatal. Nan a reconoce como e homber cu algun rato prome tabata na e truck di pan y cu a haya su mes den discusion cu e victima, y cu el a menasa e victima di morto.
E sospechoso a scoge pa nenga categoricamente su envolvimento den e asesinato. Door di esaki tanto Hof como e familiarnan di e victima no sa kico tabata e motibo di e sospechoso pa comete e delito aki, y solamente sa di e discusion cu tabatin algun rato prome. Pero e no ta zona como un motibo pa comete un crimen asina aki. E sospechoso ey Ministerio Publico tin 14 dia pa bay den apelacion di Casacion di Hoge Raad na Hulanda.
