Aruba a pasa den un boom economico pero nos gobiernonan no tabata sa administra placa di pueblo. Despues di tin mas cu 4 aña ta negocia cu Hulanda y a firma protocol tras di protocol awor kier pidi Hulanda exoneracion di debe. Nos gobierno parce a perde tur nan sentido comun. Ora tabata tin placa a malgaste y awor kier yora y hunga victima sin kier accepta cu ta nan mesun mal goberancion a crea e chaos actual.
Tabata tin placa pa regala Citgo 175 miyon dollar, tabata tin placa pa regala golden handshake despues di a retira directornan di Utilities, WEB, Elmar, Arubus y AZV. Awor cu e baca a hoga kier dempel e pos cu nan mes a coba. Tanto nos aeropuerto como Web tin den un debe mas cu 1.4 biyon florin. Durante e ultimo 5 añanan no a bin cu ningun projecto y nos a mira isla bay atras. A bin cu tur sorto di medida ora cu no tabata tin mester y a haya mas placa den caha pero e bari no tabatin bom.
Un gobierno comunista cu no sa con pa goberna y cu no kier baha gasto. A hinca un grupo chiquito den gobierno pero nan ta lubida cu e mayoria grandi cu a vota pa nan ta mal rabia paso nan tambe ta sufri di nan mal gobernacion. Un grupo chiquito cu ta gana placa pero cu no ta produci nada den caha di gobierno. Awe nan mesun hende cu ta rabia cu nan ta basha abao di nan movecion interno. Con nan a cuminsa crea departamento den Elmar y Web pa hinca nan simpatisadornan. Por trata na desmenti pero nan no por tapa solo cu un dede.
Nan ta conciente cu e ora cero a yega y cu gobierno ta riba un schaakmaat. Pueblo ta sufri paso placa no ta yega mas. Nan no kier a baha gasto riba empleadonan publico y tampoco riba bienes y servicio. Alcontrario tur gasto a subi. No a hedge y awe pueblo tin cu paga pa mal maneho den WEB y esaki ta culpa di gobierno. A hasi un fanfaria paso gasolin a baha un tiki pero di otro banda tur producto a aumenta di prijs. Kier pa pueblo biba den miseria pero tin placa pa auto nobo y pa sigui fiesta.
E maneho sin pia ni cabes cu derochamento di placa cu no tin, a pone pueblo su wowo habri. Poco poco ta pone e cana di pueblo yena te ora bisa te aki pueblo ta yega cu e gobierno aki. Si bo ta cana den pueblo tur caminda cu bo bay bo ta tende ki dia e gobierno aki ta dicidi baha na awa pa no bin nunca mas. Ta tira culpa riba tur hende pero nan no ta mira nan mesun errornan cometi. Tur e gatenan cu tin bao di e gobierno aki ta bon scondi, hinca bao di brasa pero si kier tira otro cu lodo. No scupi na laira paso e por cay den bo propio cara.
A yega tempo pa Aruba tin un gobierno di hendenan sincero y capas cu no ta hasi nan mes doño di cos cu no ta di nan pero cu nan ta eynan pa administra locual cu pueblo ta confianan cu n’e. Nos tin Dios cu ta odia inhusticia y ta dunabo chance pa arrepenti y hala di bo mal camindanan. Nos pueblo a pasa den hopi inhusticia na man di e gobierno aki y pa colmo nan no kier reconoce nan fayonan sino ta sigui den nan maldad. A jega ora pa un cambio y e gobierno aki mester tuma honor na nan mes y baha pa asina un biento di speransa por cuminsa supla riba nos barranca tan stima. Pueblo di Aruba nos no por sinta man cruza mas sino nos tur lo zink. Esaki ta e tempo pa bin cu un cumbre cu participacion di gremio comercial y sindical y otronan pa nos fiha nos posicion, Nos mester bin cu un nota y mande Hulanda y bisa esaki pueblo di Aruba ta para pe. Nos tin un gobierno comunista cu no por jega na ningun acuerdo y ademas nan no ta carga confiansa mas di pueblo.
