Durante Minister Maduro di Cultura su bishita na e atelier di e artista Arubiano Gilbert Senchi na Colombia, e mandatario a haya e oportunidad pa mira e busto di e defunto Polis Tino Ruiz cu ta den su fase final. Na aña 2017 e hoben Polis Ruiz lamentablemente a perde su bida na momento di brinda un asistencia policial. Su fayecimento a conmove comunidad y un mocion a keda presenta den Parlamento pa Gobierno laga traha un busto pa asina e famia, colega y comunidad en general por keda recorda e hoben Polis Tino Ruiz y tur otro persona cu a perde nan bida sirbiendo nos Pais.
Cumpliendo cu e deseo di famia, colega y comunidad, Minister Tjon di Husticia a otorga e trabou aki na e artista Arubiano Gilbert Senchi. Na ocasion di su bishita cerca Senchi, Minister Maduro a splica cu e busto di e Polis Tino Ruiz lo sirbi como simbolo di e forsa y alabes e fragildad di homber y muhenan cu ta sirbi nos Pais diariamente, protegiendo nos y poniendo nan bida na peliger eherciendo nan funcion. Tur cu ta haci un trabou na bienestar di nos comunidad, merece e respet debido pa nan esfuerso y e obra di arte publico aki lo t’ey pa recorda nos pa brinda respet na tur esnan cu ta sirbi nos Pais.
Manera colega Minister Rocco Tjon a anuncia, e busto di defunto Tino Ruiz lo wordo poni riba un plaza caminda cu famia, colega Polis y publico en general por pasa y mira esaki pa asina recorda nan ser keri. E artista Gilbert Senchi cu tin e obra aki na su encargo ta finalisando e trabou nan riba e busto y den e luna nan nos dilanti e busto lo wordo manda pa Aruba. Minister Maduro ta spera cu e busto aki como un obra di arte publico lo por sirbi como recordatorio cu nos mester brinda e respet debido na tur esnan cu ta traha na bienestar di nos Pais.
