Dialuna 5 di september, a tuma luga den Parlamento e reunion publico pa trata e Nota di Fin di Aña 2022 (Najaarsnota 2022). Prome Minister Evelyn Wever-Croes y demas ministernan di Gabinete Wever-Croes tawata presente pa duna cuenta financiero riba e prome mita di aña y kico ta spera pa e di dos mita di aña.
Prome Minister a contesta tur pregunta cu Parlamentarionan a haci na su persona entre otro: Landspakket, Negosacionnan cu Hulanda, Infrastructura, Operacion Bulls Eye, Arubahuis, Venezuela, Director nobo DBB, Minister Plenipotenciaro na Washington, Gasto di Abogado, Desaroyo na San Nicolas, y e edifionan di MFA.
E reunion a termina laat den anochi na unda cada minister a haya oportunidad pa contesta na forma debido e diferente preguntanan cu nan a ricibi for di miembronan di Parlamento.
Na final di su disertacion den e prome tanda, Prome Minister Evelyn Wever-Croes a expresa: “Gabinete Wever-Croes a haci cosnan hopi grandi pa finansas publico. Den e Nota di Fin di Aña 2022, ta indica cu gastonan a baha, entradanan a aumenta, y e deficit pa 2022 a baha di 227 miyon florin pa 148 miyon florin. Esaki ta resultado di trabou duro y maneho responsabel”.