Fundacion Bernadina Growell-Kock ta haci uso di e oportunidad aki pa felicita di antemano organisacion di Parada Cultural, Fundacion Chico Harms, Centro di Bario Brazil, tur grupo, tur Pilar-(Gran)Dama-Damita-Chikitinnan Cultural cu e grandioso Parada Cultura diadomingo 4 di september den bario di Brazil. Alabes kier anuncia cu fundacion Bernadina lo participa den Parada hunto cu Fundacion Pro Cultura di Aruba y St. Michael School cu ta celebrando su 65 aniversario. Fundacion ta gradici tur voluntario, John Freddy Montoya & Instituto di Cultura y su director y ta felicita St. Michael School, su Hoofd, maestronan, muchanan y mayornan cu nan aniversario.
Fundacion Bernadina a inicia su labornan na anja 2011 como comision despues di fayecimento di mama di Cultura Bernadina Growell-Kock. Fundacion pues tabata na cuna di e promer Parada Cultural den Bario di Brazil. Durante e promer Parada Culltural na september 2011 a haci alabes apertura di Caya Bernadina Growell-Kock. Tambe tabatin un expo den centro di bario Brazil di logronan y artefactonan di mama di cultura. Aki Gobernador di Aruba, sr. Fredis Refunjol, den un multitud di bishitante a efectua e apertura. Anual ta organisa festivalnan pa recauda fondo pa por participa na Parada y pa haci cierto areglo na cas di e difunta. Ademas a organisa hunto cu Centro di Bario Brazil e gran Parada cultural banda di hotelbanen na Noord (2016), a coloca un relieve di cara di e difunta na Paseo Herencia y a publica un buki conmemorativo di e difunta (2020).
Esaki ta pues e di 10 Parada na cual e fundacion lo participa, despues di 2 anja cu no tabatin Parada pa motibo di COVID 19. Sinembargo Fundacion Bernadina a organisa si un Parada di Bandera den periodo di COVID pa recorda e di 10 aniversario di apertura di Caya Bernadina Growell-Kock. Cu sosten di departamento di Cultura pa medio di sr. John Freddy Montoya tabatin presentacion di un tableau vivant pariba di misa di Brazil. For nan auto e publico por a pasa admira e dedicacion na nos mama di cultura.
Finalmente fundacion Bernadina ta gradici tur nos dama y damitanan cu a representa nos pa e ultimo 2 anjanan: Chikitin Cultural 2019: Ivy Ann Brown, Prenda Cultural 2019: Elizien Andersen, Damita Cultural 2019: Edylienne Nicolaas, Dama Cultural 2019: Genisha Angel, Gran Dama Folklore 2019: Gianine Wester-Orman y Dama Grandi Folklore: Lilian Besselink.
Fundacion ta gradici alabes sra. Lilian Besselink y Fundacion Pro Cultura di Aruba cu e anja aki a haci nos participacion na e Parada Cultural posibel. Finalmente nos fundacion ta invita un y tur pa bin presencia y disfruta di e gran Parada Cultural de pueblo di Brazil diadomingo 4 di september cuminsando for di 3 or atardi.
