E promé fase di e trabounan di renovashon na Kaya Grandi ta ranka sali riba djaluna 19 di sèptèmber. E proyekto ta enfoká riba hasi e área di siudat mas atraktivo i hasié e orguyo di komunidat boneriano. Ta bai hasi vários adaptashon riba tereno di infrastruktura i plantamentu di mata. Por ehèmpel nan ta kita e asfalt i kambié pa klenku i riba asera nan ta pone mosaiko. Banda di esei ta bini mas banki pa sinta ariba. Ta bai planta mas palu tambe, ta bini mas lus di kaya i un lugá pa mucha hunga pa asina krea un ambiente mas kariñoso.
E tim di proyekto a parti e proyekto den algun fase pa limitá molèster mas tantu posibel. Espektativa ta ku promé ku Pasku por hasi entrega di e promé fase. E trabounan di fase 2 i fase 3 ta kuminsá na aña 2023. Ta sinkronisá e planifikashon eksakto ku e stakeholdernan di Kaya Grandi, entre otro e tiendanan, restorantnan i Tourism Corporation Bonaire. E stakeholdernan akí ta yuda determiná e planifikashon tambe. Diputado James Kroon di Planifikashon Espasial: “Sentro di Playa ta e área mas bishitá pa kana keiru i hasi kompra. Pa sigui stimulá bishitantenan i empresanan, nos ta bai renobá Kaya Grandi, no solamente riba tereno estétiko, pero tambe riba tereno di infrastruktura.” E ta bira un sitio sentral kaminda grandi i chikitu por gosa konhuntamente. Spikernan permanente pa músika ta sostené tur esaki pa krea un ambiente plasentero.
Oportunidat èkstra pa stashoná outo
Embeyesementu di e área aki lo ofresé mas posibilidat na habitantenan ku tin inisiativa pa organisá aktividat sosial, manera nochi di kompra i dia di rekreashon. Esaki tambe lo atraé mas bishitante pa Kaya Grandi. Pa e motibu akí durante fase 1 lo realisá sitionan èkstra pa stashoná outo (42) riba tereno di e anterior Brion-kazèrne i durante fase 2 lo bini 85 mas aserka na stadion di Playa. Diputado Hennyson Thielman di Ekonomia i Turismo ta bisa: “Pa Kolegio Ehekutivo ta importante ku tantu nos poblashon lokal komo doñonan di tienda ta probechá optimalmente di Kaya Grandi. Sentro di Playa ta e kurason ekonómiko di Boneiru i tin balor históriko. Pa sigui stimulá aktividatnan empresarial, ta importante pa invertí den nos kaya prinsipal i hasi esaki mas bunita i mas atraktivo.”
