EU-Desk Curaçao huntu ku DutchCulture i Creative Europe Desk NL ta organisá un workshop grátis pa tur persona i organisashon lokal interesá pa haña mas informashon tokante posibilidat di sosten i fondonan di union oropeo disponibel pa nos sektor kultural i kreativo. E workshop ta tuma lugá di 4’or pa 5:30’or di atardi, ariba na Plasa Rondó, Punda.
Durante e workshop akí, lo tin entre otro un seshon tokante kiko e programa di Creative Europe ta enserá i tokante sosten di DutchCulture na persona i instansianan riba tereno di kultura. Prins Bernhard Cultuurfonds pa Karibe tambe lo tene un seshon durante e workshop tokante nan áreanan di trabou, posibilidatnan di finansiamentu i tambe tokante nan ròl komo punto di konekshon pa e fondonan kultural di Hulanda. Despues di e workshop, ta sigui oportunidat pa esnan presente konektá i kombersá mas ku otro.
ta un organisashon enfoká riba konosementu i ‘netwerk’ riba tereno di kolaborashon kultural internashonal den Reino. E organisashon akí, ta proveé informashon, konseho i training pa tantu persona komo organisashonnan den e sektor kultural i kreativo pero tambe gobièrnunan i personanan den puestonan diplomátiko ku tin ambishonnan internashonal. Tambe, DutchCulture ta konektá profeshonalnan kreativo, organisashonnan i gobièrnunan di Reino den kuadro di kolaborashon internashonal.
Creative Europe Desk NL, ta kai bou di Dutch Culture. Creative Europe Desk NL ta e punto di informashon i konseho den Reino pa e programa di sosten di 7 aña pa sektor kultural, kreativo i oudiovisual, Creative Europe.
Creative Europe Desk NL ta konsehá e sektor kultural, kreativo i oudiovisual kiko ta tur e posibilidatnan ku e programa Creative Europe ta ofresé pa nan por yega na fondonan Oropeo, pero tambe nan ta ofresé yudansa pa skirbi un petishon pa un di e fondonan disponibel. Dianan 29 te ku 31 di ougùstùs próksimo, dos representante di Creative Europe Desk NL, sr. Jelle Burggraaff i sr. Albert Meijer, lo ta di bishita na Kòrsou i e Workshop ku lo tuma lugá djaluna 29 di ougùstùs tambe ta forma parti di e bishita akí.
Mas aleu, durante di e bishita di e representantenan di Dutch Culture i Creative Europe Desk NL, EU DESK Curaçao i Ministerio di Desaroyo Ekonómiko (MEO) a hasi posibel pa e representantenan akí por hiba kombersashon tambe ku tantu representantenan komo esnan responsabel pa traha maneho riba tereno kultural i kreativo aki na Kòrsou i asina deliberá mas aleu tokante koperashonnan kultural internashonal i posibilidatnan di finansiamentu for di Union Oropeo.