“Ohala esaki ta un estimulo pa boso sigui practica deporte y inspira otronan pa tambe sigui den e direccion aki”
Diasabra anochi, Prome Minister Evelyn Wever-Croes tabata tin e honor di ta presente na e bunita evento di Premio Excelencia pa Deporte organisa pa Minister di Deporte sr. Endy Croes. E anochi aki a conta cu un sala yen, consistiendo di ministernan, parlamentarionan, e nominadonan compaña pa nan famianan y representante di diferente federacion.
Un total di 141 atleta a ser nomina pa cu e evento aki. Tambe a duna homenahe na 10 baluarte den deporte y a premia e ekipo di aña 2021.
Prome Minister ta gradici Minister Dangui Oduber pa su contribucion den prepara e reconocementonan aki di 2019 y Minister Endy Croes pa e reconocementonan di 2021 y pa organisa e bunita evento aki.
“Un pabien na tur atleta cu a ser nomina y un pabien special na esnan cu a gana premiacion. Ohala esaki ta un estimulo pa boso sigui practica deporte y inspira otronan pa tambe sigui den e direcion aki,” Prome Minister Evelyn Wever-Croes a expresa.
