Tur caminda nos ta tende e palabra “ Hende di influencia”, pero un cos bo por ta sigur cu si e influencia cu bo ta ricibi , no ta contene temor di Dios, tampoco ta agrada Dios, y si e no ta positivo ,e ta mal influencia.
Mal influencia por bini for di tur tipo di hende, pasobra tin hende cu ta sabi ta usa mal influencia, pa mantene otro esclavo, pa domina hende, tin hende ta influencia otro pa gaña , mata, adultera,apoya maldad, permanece den idolatria, cosnan cu ta abominabel den bista di Dios.
Nos muchanan ta ricibi mal influencia di hende inmoral cu ta ofrece droga, di canticanan baho y video repugnante nan ta mira diariamente,y scucha mentira for di boca di hende grandi iresponsabel,kende ta pusha nan den mal caminda y asina biba sin Dios y drenta mundo di scuridad.Actualmente na mundo mucha ta wordo mal influencia tocante nan identidad sexual, y mayornan ta den un lucha grandi pa contradeci esey..
Hende no ta perfecto ( Filipensenan 2:12-14) pero tin asina tanto influenciador awendia cu ta causando dolor den cas di famia, pasobra hobennan ta wak riba nan y no ta busca drechi e tipo di bida cu e persona ta biba.( 1 Corintionan 6:9+10).
1 Corintionan capitulo 15 :33-34 ta para scirbi : No laga hende gaña boso , mal compania ta daña bon custumber. Uza boso sano huicio manera mester ta, y stop di haci pica, pasobra algun no tin conocemento di Dios.Mi ta bisa esaki pa brongosa boso.
Pa falta di conocemento di Dios nos hobennan ta wordo malinfluencia, y asina cay den trampa, y hopi di nan ta termina den prison, perdiendo asina nan precioso hubentud.
Tene cuenta cu Salmo 1: 1 ta bisa bon cla pa tur hende sa hunto cu ken bo tin di cana, para, y sinta. Pasobra e cos ta birando di mas e diabel kier pone nos hubentud trompica tur momento, y si nos como mayor no ta lanta, nos lo yora, pasobra nos no a pone atencion pa guia nos yuinan(Efesionan 6:4).
Proverbionan capitulo 22 vers 24-25 ta para scirbi: No sera amistad cu hende cu ta gusta rabia, y no anda cu hende di mal genio,pa bo no siña su camindanan y pone un trampa pa bo alma.
Proverbionan 13:20 ta para scirbi; Esun cu anda cu hende sabi lo ta sabi, ma un compañero di hende bobo lo sufri daño.
Ora un hende ta rebeldia contra Dios su palabra y su principionan e ta cay bao di influencia di satanas, wak Samson, Rey Saul, y actualmente wak kico ta pasa entre Rusia y Ucranaia y analisa pa bo mes e mal influencia cu ta reina den curason di hende. .
Si un mayor permiti, idolatria, adulterio, inmoralidad drenta cas, e tin di carga e consecuencia, pasobra pica ta bini carga cu tur sorto di mal influencia.
Tin hasta gobernantenan ta usa malinfluencia, pa lanta pueblo contra otro, pa trece division den pueblo, pensando cu asina nan por keda na poder, pero locual nan no sa ta cu Dios ta odia esun cu ta causa division entre rumannan ( Proverbionan 6:19).
Hopi ta wordo influencia door di artista etc, pero nan no ta busca drechi tocante e bida personal di e artista,bo tabata sa cu un hende cu mente malbado por influencia un otro pa comete inmoralidad sin cu nunca e mes a hacie.