Diamars 16 di Augustus ultimo, lider di partido MAS y Parlamentario Marisol Lopez Tromp, a pasa ocho ora den combersacion, of e por tabata interogacion pero tambe aclaracion di un supuesto caso caminda el a entrega keho contra di un ex minister.
Ocho ora di reunion of interogacion, no ta algo normal y aki tin cu mustra cu dialuna 15 di Augustus, reces di Parlamento a termina loke ta pone cu diamars 16 di Augustus, e lider di MAS mester ta trahando na parlamento y ta bay pasa ocho ora na oficina di Landsrecherche sin cu ningun hende sa kico el a bay haci of pakico pa di cos ocasion, el a wordo yama pa bin Landsrecherche.
Declaracion duna despues di a sali di oficina di Landsrecherche, a bruha e asunto ainda mas na luga di aclaria esaki, caminda Marisol ta bisa cu esaki lo tin di haci relaciona cu Haime Croes y keho cu lo a wordo entrega contra di e persona aki.
Parlamentario Lopez Tromp a bisa cu su presencia tabatin di haber c’un audio cu Landsrecherche lo tin, no a keda mucho cla cu ta di e politico of di Haime Croes, tambe cu e tin di haber cu traduccion cu loke el a manda aden etc, etc.
Sinembargo eynan caba tin algo cu no ta klop ya cu Landsrecherche cu ta investiga casonan pa Ministerio Publico, por a haci uzo di varios “tolk” cu ta wordo uza pa diferente trabou, pues en realidad presencia di Marisol na Landsrecherche mester tabata pa algo totalmente otro.
Ora cu pensa bon riba otro casonan casi similar, esta cu tin di haber cu otorgamento di tereno di gobierno, tin casonan manera di Paul Croes y di Benny Sevinger, caminda nunca Landsrecherche a pidi esunnan cu a entrega keho contra di e dos Ministernan aki, mester a bay sinta na oficina di e hendenan aki pa traduci of aclaria nan kehonan entrega.
Awor pa prome biaha pueblo por mira cu Marisol Lopez Tromp tin cu bay duna splicacion na recherchenan, di kehonan cu el a entrega mientras cu normalmente ta Landsrecherche tin di haber di investiga tur loke a wordo entrega cu e keho, ta nan tin cu busca un traductor pa traduci Papiamento pa Hulandes, of Hulandes pa Papiamento pero den e caso aki, e lider di MAS kier pa tur hende realisa cu no ta su persona ta wordo investiga.
Den caso di ex minister Benny Sevinger, recherchenan di RST y di Aruba, a bay cu hopi documento caminda un gran parti di esakinan tabatin di haber cu tambe ex Minister Marisol Loepz Tromp, cu tambe tabata minister di infrastructura principalmente den gobierno di MEP pa ocho aña y despues un aña den gobierno di MEP-POR-RED, ora cu el a tuma over pa Otmar Oduber.
Aki e lider di MAS tin cu splica pueblo, si e dia di diamars 16 di Augustus, sinta ocho ora largo den oficina blauw di Landsrecherche, e lo cobra salario di parlamento pa esaki, ya cu dialuna un dia prome reces a caba pero e no a bay oficina y diamars no a cumpli cu ocho ora di trabou na parlamento pero a pasa ocho ora den interogacion na Landsrecherche.
E lider di MAS tin cu demostra na pueblo cu e ta integro, cu e lo no cobra e dia aki den su salario di e siman aki.
