Despues di e debacle cu e rapport di Carmabi cu ta mustra cu awanan na costa Zuid di Aruba ta contamina, minister Arends, a bin cu otro maneho dudoso mas. Ora ta trata di e dump na Parkietenbos deliberadamente el a scohe pa no cana e caminda normal di anuncia un maneho di desperdicio. En particular e no a anuncia ningun destaho publico pa recruta companianan local pa procesa cierto waste streams. Tampoco gobierno a anuncia cu e maneho lo encera cu e gastonan pa procesa cierto tipo di desperdicio lo bira parti di e responsabilidad di ciudadano of di tire repair shops. Ursell a scohe pa bin cu un maneho mentiroso bao di e nomber Trash2Cash. El a crea e expectativa cu e proyecto di Trash2Cash lo realisa un Economia Circular. Tur cu conoce e materia a pensa di biaha cu Trash2Cash lo duna man y pia na e filosofia Cradle to Cradle: empresanan mester a presenta un business case splicando con nan lo uza sushi (Trash) como materia prima pa crea productonan cu lo a genera un Return on Investment saludabel. Sin embargo, esaki tabata un mentira sin berouw. Empresanan a presenta proyectonan cu no ta rendabel den expectativa cu gobierno lo subsidia nan operacion.
E manera di traha aki di Ursell ta crea hopi pregunta encuanto integridad di e minsiter di Integridad. Ursell, por ehempel, a dicidi di promove riba Facebook e solucion di Jamal di Carentra pa procesa taira. Despues di a propaganda e operacion di Jamal, minister Ursell a monta un show unda cu Jamal mester a bin cu un Power Point Presentation cu su business case splicando con e por converti taira (Trash) den un producto cu lo a genera un ganashi p’e. Ta hustamente aki e rabo di porco ta krul, pasobra aparentemente e operacion di Carentra mester di un subsidio di gobierno pa haci procesamento di taira atractivo p’e. Lamentablemente nunca nos lo sa si ta Carentra a pidi subsidio of si esaki tabata e idea di Ursell. Al fin y al cabo Ursell a aplica e mesun modus operandi cu gobierno a aplica den e caso di Eagle LNG: el a rekeri pa tur hende presente den e presentacionnan di e companianan firma un non-disclosure agreement. Esaki Ursell ta yama transparencia!
Aparentemente gobierno a gusta e opcion di Carentra, pasobra gobierno a dicidi di yuda financia Carentra. Ursell a dicidi di obliga ciudadano/ tire repair shops pa paga pa benta taira afo. Ora algun tire repair shop no kier coopera cu e idea briyante di Ursell e kier rabia tambe y ta bira promove companianan cu si ta bay na su amen. Por ta ta bon pa remarca cu ora mi persona a haci un comentario riba mi FB-pagina encuanto e 3,- florin, Jamal tambe a rabia y a dicidi di post barbaridad. Enfin, henter e cuenta aki ta hole stinki, ta parce un fixmento den dia cla.
Minister Arends por a evita e aparencia di faboritismo aki door di a bin cu un maneho transparente y un destaho publico. E por a splica kico e idea di un economia circular y Cradle to Cradle ta. Cu e tremendo team di mercadeo cu Ursell tin, e por a splica ciudadano desde un inicio cu lo mester contribui financieramente na e solucion di e problema di desperdicio.
