Minister di Asuntonan Economico, Comunicacion y Desaroyo Sostenibel, Geoffrey Wever ta anuncia inicio di e proyecto “Finansas den bo Hogar”. Esaki den cuadro di su maneho di Educacion Financiero Nacional. Meta di e proyecto ta pa nos hendenan ricibi guia y conocemento cu por yuda tuma decisionan financiero cu ta beneficia su bienestar.
Hunto cu Fundacion Plan di Bida cu a desaroya e proyecto “Finansas den bo Hogar”, ta bai ofrece un programa di educacion financiero. Fundacion Plan di Bida ta dispuesto pa comparti nan expertisio riba e tereno aki y contribui tambe na bienestar financiero di nos hendenan.
Na Aruba 3 di 10 hogar ta gasta mas di loke nan ta gana tur luna segun sondeo di Banco Central di Aruba. E desaroyo aki ta uno preocupante pasobra e ta indica cu cada luna ta un reto pa hogarnan cumpli cu tur necesidad y responsabilidadnan financiero manera gasto pa huur, cuminda, y prestamonan personal. Como consumidor ta importante pa sa ki impacto cada decision financiero tin riba nos cartera y nos hogar.
Pa por duna apoyo na e ciudadano, Ministerio di Asuntonan Economico, Comunicacion y Desaroyo Sostenibel ta inicia e proyecto Finansas den bo Hogar. E proyecto ta un curso cu lo trata 4 tema importante riba con pa maneha nos finansa cada dia. E temanan ta:
- Mi ta efectivo den mi cas. Con mi por spaar y tambe con pa cumpra sin emocion
- Mi ta paga mi debe. Kico lo pasa ora mi no por paga mi debe mas
- Mi ta inverti den mi futuro. Futuro di nos y nos yuinan ta importante y con nos por logra nos metanan
- Mi presupuesto. Kico ta luho y prioridad y con segun bo entrada bo por presupuesta y asina logra metanan
E curso lo ser duna den districto di Noord, Santa Cruz, San Nicolas, Paradera, Savaneta y Oranjestad. Lo anuncia pronto mas informacion over di e proyecto aki.
Tuma decision financiero ta rekeri cierto conocemento cu ta forma parti di educacion financiero. Educacion financiero ta importante pa desaroyo di nos mes como hende, como consumidor y como pais segun minister Geoffrey Wever. “ Mi ta orguyoso cu e proyecto aki ta bai inicia y agradecido cu Fundacion Plan di Bida ta colabora cu Gobierno di Aruba y asina duna nos hendenan e abilidad y conocemento pa stimula nan propio desaroyo y bienestar financiero.”
