Último dianan, e situashon aktual di Sentro di Bario Rincon ta den notisia atrobe. Esaki ta un desaroyo positivo. Abitantenan di Rincon ta preokupá ku pa hopi aña kaba Rincon ta e úniko bario na Boneiru ku no ta disponé di un ‘kas komunitario’ supsidiá pa nos gobièrnu lokal, manera otro barionan si tin.
E edifisio den sentro di Rincon ta propiedat di Stichting Cultureel Centrum Bonaire (CCB). Hopi hende lo kòrda ku ántes, ku sosten di gobièrnu, hopi aktividat kultural i deportivo tabata tuma lugá na Sentro di Bario Rincon i su portanan tabata habrí pa tur hende. Komo fundashon, CCB tin un mishon públiko, na bienestar di pueblo i spesialmente e komunidat di Rincon. Pero muchu hopi tempu a pasa kaba ku CCB no ta disponé di e medionan pa kontinuá ku su programanan i pa mantené e edifisio. Pa e motibu akí algun luna pasá e direktiva aktual di CCB a empoderá dos persona pa hasi e preparashonnan pa revitalisá e edifisio di CCB i pa buska fondo públiko pa lanta e sentro bèk riba su pia.
E dos personanan ta Daisy Coffie i Jude Finies, direktora di Fundashon Museo Terramar i habitante di Rincon. Ku enkargo di direktiva di CCB, e dos personanan ta den proseso di inventarisá e pasonan nesesario pa renobá i modernisá e edifisio, desaroyá programanan kultural i deportivo i pa buska fondonan públiko pa por lanta e sentro di bario bèk, den e edifisio meimei den sentro di Rincon, pa pueblo di Rincon, pa Rincon su arte, kultura i historia. E dos personanan ta den kombersashonnan inisial kaba ku gobièrnu na Den Haag i ta preparando proposishonnan konkreto. A tuma kontakto ku diputado Kroon pero no a logra haña un reakshon ainda di diputado.
Pa CCB ta sumamente importante pa yega na un solushon duradero i pa término largu. Mester evitá ku, spesialmente den e periodo di elekshon aki, Sentro di Bario di Rincon ta bira un tópiko di diskushon i interferensia polítiko. E Sentro di Bario mester bolbe bira un lugá pa tur hende. E personanan ta sigui purba drenta den un kombersashon fruktífero ku nos gobièrnu lokal. Nos ta spera ku esei lo tuma lugá mas pronto posibel. Miéntras, e dos personanan ku enkargo di CCB ta sigui kana diferente kaminda pa yega na e meta prinsipal: trese e partnernan huntu i krea fondo públiko pa konhuntamente por solushoná e situashon aktual na bienestar di henter pueblo di Rincon.
E personanan lo tene pueblo na altura di tur desaroyo nobo relashoná ku nan progreso.
