Aruba su turismo ta pasando den su mihor momento y esaki ta keda demostra den e raportahe nan di Aruba Tourism Authority. E maneho di Minister di Turismo sr. Dangui Oduber ta dunando su resultado y esaki por mire den e cantidad di turistanan cu ta yega nos isla tur dia. Pa di 4 luna consecutivo e recuperacion ta surpasa nivelnan di aña 2019.
Den luna di juli Aruba a ricibi un total di 109.006 bishitante via nos aeropuerto y esaki ta un recuperacion di 105% si compare cu juli di 2019 cu Aruba a ricibi 103.464 bishitante. Locual a resalta den e raportahe tambe ta e recuperacion di nos mercado mas importante cu ta Estados Unidos cu a registra 109% porciento di recuperacion den luna di juli.
Aruba su recuperacion den general ta na 92% porciento cu ta excepcional mirando cu e grado di recuperacion den nos region ta na 60% porciento. Esaki ta haci cu Aruba ta na di dos puesto mundialmente den e paisnan cu miho recuperacion di su turismo. E aeroliñanan tin confiansa den Aruba y esaki bo ta mire den e diferente rutanan nobo cu nos tin na diferente pais.
Minister Oduber ta gradici tur e partner nan den turismo cu cu ta haci cu awe Aruba ta recuperando acceleradamente. Danki na e pueblo cu a demostra di ta uno resiliente, ban sigui demostra nos cordialidad y duna e hopitalidad na cu nos ta conoci pe. Turismo ta keda e driver principal di nos economia.
