Esaki no ta prome ni di dos caso si Conseho di Minister no pone un maneho pa para e caos cu tin den Departamento di Infrastructura y Planificacion. E falta di un control debido riba loke ta wordo haci na DIP a causa cu tin un cantidad grandi di caso sumario (civil) den Corte.
Den e caso specifico di e grupo di inversionista Ruso cu a pidi un opcion riba un pida tereno banda di Eagle Beach cu ta keda cerca di Hospital. E destinacion di e tereno ta pa construi un hotel specialisa den cuido. E director Haime Croes a bay di acuerdo pa duna nan e tereno den opcion.
E inversionista a haci entre otro e estudio di Medio Ambiente (MER) y a cumpli cu entrega cu cartanan di recomendacion y garantia di banco, cu ta mustra cu nan tin e recursonan pa ehecuta e proyecto en cuestion.
Pues, e grupo a bin ta cumpliendo cu tur e condicionnan ora cu diripiente nan a haya informacion cu a bini un conseho negativo di director di DIP Haime Croes pa otorga e tereno, pasobra no a cumpli cu e condicionnan. E grupo a keda sorprendi, segun por a compronde, pasobra nada di esaki ta berdad. A bin ta cumpliendo cu tur condicionnan y ta den combersacion (cu palabracionnan haci) cu Haime Croes.
E grupo Ruso aki no ta e uniconan cu a haya problema cu director di DIP, cu aparentemente no tin ningun control riba loke e ta haci. Na final di cuenta DIP ta un departamento di Gobierno cu ta cay bou di ministerio di Infrastructura. E por tin un maneho stipula, pero mester tin control na final di e Minister encarga. Mas ainda, si mira e tantisimo casonan cu tin den Corte y cu tin Huesnan cu man yena. No ta casonan facil cu por finalisa hopi lihe. Pero e consecuencia ta cu e ta daña reputacion di Aruba y cu por tin repercusionnan financiero tambe. aki e algemenebelang ta hungando un rol pa e economia di Aruba.
Inversionistanan Ruso cla pa demanda Minister pa incumplimento di DIP
