Tur aña di nobo un grupo den nos komunidat ta risibí rekonosementu di rango haltu, kual ta un kondekorashon Real.
Entrante awor te ku djamars, 30 di ougùstùs, por postulá suidadanonan ku a bin ta duna un aporte eksepshonal pa mas
ku 15 aña komo boluntario òf siudadanonan ku a hasi un aporte ekstraordinario banda di nan trabou, pa nan por bini na
remarke pa un kondekorashon real.
Tin diferente kategoria di kondekorashon real. E dos kategorianan mas usual na Kòrsou ta Orde van Oranje Nassau i Orde van Nederlandse Leeuw.
Den e kategorianan aki tin rango di Lid, Ridder, Officier i mas. Konforme e aporte eksepshonal i ekstraordinario di e persona ta dune kondekorashon komo lid òf ridder,
ku ta esnan ku mas sa otorgá na Kòrsou.
Personanan ku ta bini na remarke pa risibí un Kondekorashon ta un persona ku a kontribuí di forma eksepshonal na nos komunidat.
E kontribushon por ta sea pa medio di su aporte na bienestar di nos hóben, adulto òf nos grandinan. E persona mester a hasi trabounan boluntario,
sin pago òf salario, pa un tempu mas largu ku 15 aña i a dediká algun ora pa siman na esaki.
Tambe un persona ku a kontribuí òf destaká di forma eksepshonal na deporte, enseñansa òf siensia na Kòrsou por bini na remarke pa risibí un Kondekorashon Real.
Por postulá suidadanonan te ku djamars, 30 di ougùstùs 2022 pa kondekorashon pa próksimo selebrashon di dia di Rei.
Mester postulá suidadanonan for di awor. Esei ta pa tene kuenta ku e proseso ofisial na Kòrsou i Hulanda, inkluso firma di Rei,
promé ku e fecha di kondekorashon e siguiente aña. Komishon di Kondekorashon ta evaluá i kontrolá tur informashon ku nan risibí.
Despues di evaluá i kontrolá tur informashon e komishon ta entregá e lista di nominadonan na Gobièrnu di Kòrsou pa trata esaki den
Konseho di Minister. Seguidamente e nòmbernan ta bai pa Gobernadó di Kòrsou, ku na su turno ta manda e nòmbernan pa Hulanda pa evaluashon i aprobashon final.
Abo por postulá un kandidato i asina kontribuí pa un persona haña e rekonosementu ku e meresé na nivel di Reino Hulandes.
Pa postulá bo kandidato bo por bishitá e página www.gobiernu.cw/kondekorashonreal, download, yena i entregá bo
petishon na Bentana di Informashon na Saliña. Huntu ku e formulario mester entregá algun dokumento importante tambe.
Banda di informashon di kontakto di e kandidato, e petishonario mester entregá informashon tokante trabou i dos otro persona ku ta afirmá
pa medio di 2 mitar A4 e trabounan di e persona postulá. Pa mas informacion por yama Ashanti Harris na telefòn 529-8969.