Un yiu cu ta rebeldia contra su mayornan, no solamente ta rebeldia contra su mayornan pero e ta rebeldia contra Dios tambe, pasobra e palabra di Dios ta bisa den Efesionan 6: 1-3 pa tur yui honra nan tata y nan mama.
Rebeldia bao di mucha especialmente bao di hubentud ta algo mundialmente conoci, pero nos no ta yama pa laga cos bay for di man, pero pa haci tur locual ta na nos alcanse, pa e hoben no haci manera e kier, y cay den delincuencia hubenil, y mas despues bira un bandido sin scol, pero pa restaure na tempo y asina libre for di gara di e enemigo.
Salmo 1 :7 ta bisa: E temor di Señor ta principio di conocemento, bobonan ta despresia sabiduria y instruccion.
Como mayor abo ta e prome persona yama pa haci e trabao di restauracion.
Prome punto ta Oracion, Oracion, y mas Oracion, pasobra den bo oracion Dios ta contesta y guiabo den tur locual cu bo mester haci.
Punto number dos ta :
Identifica e dolor di e mucha, rebeldia ta un cos profundo, bo no por trate superficial, y bisa ta cos di mala mucha, bo mester sa di unda e comportacion ey ta bini y kico falta bo yiu.
Papia cu bo yiu pa bo sa ken of kico a heride, y pone cu diripiente su actitud a cambia, y hopi biaha tambe vocabulario ta cambia.
Por ta sin bo mes a ripara ta bo actitud como mayor a herida e mucha y asina pone perde confiansa den bo como mama of tata, y e no sa con expresa su mes, y asina rebeldia ta drenta.
Tin cosnan fuerte ta pasa den famia, manera violencia, infieldad, mal maneho financiero, abuso verbal of fisico di mucha cu ta causa rebeldia den un mucha.
Anto hopi biaha nos ta core busca dokter, psicologo, terapista, anto e restauracion ta cuminsa serca e propio mayornan na cas.
Un mucha cu ta mira su mayornan ta gasta placa na paranda, gamble,infieldad,droga , anto e ta yega cas for di scol ,awa ta corta, cu ni sikiera e por baña, por expresa su mes den rebeldia.
Pasobra ta su propio mayornan ta e causante.Pesey semper busca pa sa e motibo di e hoben su rebeldia.
Y ora boso como mayor nota cu ta boso tin fout, por fabor pidi e hoben despensa y deal cu boso fout no cu e hoben.
Pasobra tin error di mayor cu ta stroba crecemento firme di un mucha.
Coopera cu bo yiu y no competi cu bo yiu, no wak su fout y cada rato keda ripiti bisando “Ningun hende den e cas aki no ta manera bo”, di e forma ey bo ta herida mas cu bo ta restaura.
No halsa bo mes ni tampoco ningun otro yiu den cas riba e yiu cu ta den rebeldia, yuda e mucha forma un karakter firme y stabiel.
Trece e mucha riba caminda di Señor cual ta deber di tur mayor, pasobra sin Dios e caminda di bo yiu lo tin hopi strobacion den dje.
Demostra cu boso bida na boso yiu dunando un bon testimonio, tanto di tata como di mama, sin bisa nada, pero e hoben por mira, cu ta asina ta un hende drechi.
Si bo mira un fout di bo pasado den bo yiu, sabi cu ta momento pa duna Amor, pasobra mesun Dios cu ayuda abo por yuda bo yiu tambe.
