‘Stimami Sterilisami’ no ta un fundacion desconoci na Aruba. Na 2016, Bucuti & Tara a inicia e fundacion aki cu e meta pa confronta e problema di pushi y cacho riba caya di un forma sostenible. Cu e programa aki e gasto di operacion di sterilisacion ta bira significantemente menos pa doñonan di mascota y tambe pa organisacionnan cu ta cuida bestianan riba caya.
Como destino turistico pero tambe como hogar pa nos hendenan e ta sumamente importante pa minimisa e sufrimento di bestianan riba caya, alivia e molestia visual cu bestianan riba caya ta causa como tambe evita situacionnan cu por causa inseguridad pa nos hendenan y bishitantenan.
Desde 2016, A.T.A. a forma parti di e proyecto aki cu fondonan, conhuntamente cu Bucuti & Tara y TPEF. Hopi biaha A.T.A. ta ricibi critica riba e problema di pushi cu cacho riba caya via diferente canal y ta mira e importancia di busca solucion conhuntamente pa esaki. Na 2020 debi na e pandemia tanto A.T.A. como TPEF mester a stop nan fondonan y a opta pa pone e proyecto on hold temporalmente. Desde 2022, tanto A.T.A. como TPEF a cuminsa entrega fondo bek na e fundacion.
Recientemente, a celebra e logro di 30,000 sterilisacion desde e comienso di e fundacion aki. A.T.A. ta gradici tur cu ta forma parti di e proyecto aki y ta spera di sigui conta cu e cooperacion di nos comunidad pa contribui na menos pushi cu cacho riba caya.