Landsverordening tot wijziging van de Landsverordening van de 27ste juni 1996 tot vaststelling van beginselen van het gevangeniswezen (Landsverordening beginselen gevangeniswezen), un proyekto di lei hopi interesante i importante a keda presentá i entregá na Parlamento dor di Movementu Futuro Kòrsou (MFK).
E lei aki ta toka prinsipalmente algun aspekto interesante kaminda mester pone atenshon na drecha sirkunstanshanan di e detenidonan. Tin ya kaba 14 rapòrtnan internashonal for di aña 1994 te ku aña 2017 ku a konstatá i a denunsia defisiensianan ku tin den SDKK ku te dia di awe no a keda remediá dor di ningun gobièrnu di turno. Na aña 2015 ku tantu palabra den e raport di CPT a konstatá ku SDKK ta un sentro inadekuá pa sera detenido. Tambe den e mesun rapòrt aki ta reportá ku e sentro aki sistemátikamente ta trapando i violando grandemente derechinan humano di detenidonan.
Alimentashon ta un parti masha vital pa e detenidonan den SDKK pero akinan tambe gobièrnu ta faya drástikamente ku su obligashon riba e tereno di alimentashon aki te ku último a bin konstatá hasta kasonan di salmonella den SDKK ku ta un kos inkomprendibel ku tabata pasando den e fasilidat. Di parti di frakshon di MFK a bai karta ku preguntanan dirigí riba e tópiko aki i tambe e demas difikultatnan pa minister di Hustisia pa e na su turno komo e minister responsabel koregí i remediá e situashon ku ta manifestando den e fasilidat. Riba tereno di enseñansa ta pésimo, a bai dje leu ei ku hasta ku por riska di papia ku tin sierto kasonan di analfabetismo bou di detenidonan, aunke ku pa aña kaba na Kòrsou nos konosé un enseñansa obligatorio (leerplicht).
Ku e inisiativa di e lei ku MFK a presentá aki lo bira posibel ku ta bai koregí, mehorá i drecha tur e difikultatnan ku tini den SDKK di moda ku detenidonan tambe na nan turno por apelá riba kumplimentu di derechinan ku nan tin ankra den kambionan ku ta paresé den e lei aki dia esaki drenta na vigor.