MISS TEEN ARUBA INTERNATIONAL ta diadomingo 17 di July den Cas di Cultura
Conta nos un poco di bo mes ?
Ami ta Annaïs Thiel, mi tin 17 aña y mi ta hopi contento cu e aña aki mi a slaag na Colegio San Antonio. Mi ta gusta canta, baila y saca potret (tanto dilanti y patras di camara). Mi ta gusta traha cu y entretene mucha y pesei recientemente mi tabata “Isabella” riba stage den e show di Encanto.
Kico ta bo plan pa futuro ?
Den futuro mi tin varios plan, pero esun di mas cerca ta pa sigui studia na EPI Welzijn pa asina bira un enfermera y despues sigui specialisa den e mundo di medicina na Hulanda. Banda di esei, mi kier sigui traha cu Heart Centered Leadership Foundation y yuda mas hoben cu ta posibel bira e mihor version di nan mes.
Kico e temporada aki di Miss Teen a representa pabo ?
E temporada di Miss Teen Aruba International pa mi ta representa un oportunidad unico pa enfrenta tur mi insiguridadnan, siña y aporta na hobennan manera mi mes cu tambe ta deal cu insiguridad.
Kico pabo ta Belleza ?
Belleza ta tur caminda! Den naturaleza, den paisahenan, den architectura y den experiencianan comparti cu otro. Pa mi belleza ta algo cu bo ta sinti di un persona, dus e ta e sentimento cu ta wordo crea door di actonan bunita cu un persona ta haci pa otronan rond di dje.
Kico ta bo mensahe pa Hubentud ?
Mescos cu ami ta haciendo, si abo como hoben tambe ta deal cu insiguridad, e mihor manera pa soluciona esaki ta door di papia tocante e topico cu un hende cu bo ta confia y cu por yuda bo. E ta normaal cu como hoben bo por tin duda den bo mes, pero e no ta normaal cu como hoben bo ta duda den tur area di bo bida. Pa esaki por aserca Heart Centered Leadership Foundation pa ricibi e guia y pa wordo inspira y empodera pa ta e mihor version di bo mes.
Si bo representa Aruba den exterior , kico lo bo destaca di Aruba ?
Ami lo destaca cu Aruba ta un isla chikito cu ta produci hobennan talentoso den diferente ramo. Nos hobennan ta destaca den deporte, estudio, musica, arte y hopi mas. Door di comparti storianan di exito di nos hobennan local mi lo kier inspira otro hobennan den exterior pa nan tambe kere den nan talentonan y haci mas uso posibel di nan. Tin biaha ta djis 1 persona bo mester pa bisa bo cu e ta kere den bo, pa pusha bo pa alcanza metanan grandi. Y e persona ei ta bai ta un mucha muher orguyoso di ta Arubiano.
