E tabata dialuna mainta trempan ora cu Aeropuerto Internacional Reina Beatrix (AUA Airport) a yama bonbini na Jetair su buelo inaugural cu servicio directo for di Curacao pa Aruba.
“Nos ta contento di agrega Aruba na e network di Jetair. Deliberadamente nos a warda te cu awe pa sigura cu nos tin algo adicional pa ofrese nos pasaheronan Arubiano. Banda di yega Curacao di forma comfortabel y liher, nos coneccionnan di dialuna y diabierna ta ideal pa un “weekend getaway” na Curacao of pa un profesional cu mester bishita Curacao pa un dia of un siman. Adicionalmente, Jetair ta ofrese coneccionnan facil for di Aruba pa Kingston riba dialuna y tambe pa Sint Maarten riba diabierna. Nos ta ansioso di por ofrese e servicio nobo aki pa Aruba y nos ta spera di mira bo pronto abordo,” asina Jetair su CEO Sr. Robert Maas a expresa.
Manera Sr. Maas a menciona, Jetair ta programa pa brinda servicio non-stop for di Curacao pa Aruba riba dialuna y diabierna. Jetair lo usa un avion F70, cu e capacidad di 80 asiento. E aerolinea su schedule di yegada y salida ta complimenta e trafico di biahamento pa placer y pa negoshi den ambos direccion:
Dialuna – E avion lo sali for di Curacao 7:00 AM, yegando Aruba 7:35 AM, y saliendo bek pa Curacao 8:20 AM.
Diabierna – E avion lo sali for di Curacao 6:55 PM, yegando Aruba 7:30 PM, y saliendo bek pa Curacao 8:15 PM.
Jetair ta e di cuater aerolinea cu ta basa na Curacao cu lo ofrese servicio entre e islanan Aruba y Curacao, cu posibilidad amplio pa conecta cu otro destinacionnan den Caribe, manera Paramaribo, Kingston, St. Domingo, St. Maarten, y Port-Au-Prince. “Nos ta hopi ansioso pa yama Jetair como un partner bonbini, mirando cu desde awe AUA Airport ta brinda mas di 60 buelo semanal entre Aruba y Curacao. Cu e cantidad di asiento disponibel abordo di Jetair, nos a yega un Capacidad di Asiento mensual di aproximadamente 6000 asiento for di e region di Antiya Hulandes. Esaki ta un noticia fantastico, specialmente pa nos biaheronan cu awo tin opcion adicional pa biaha pa Curacao y otro destinacionnan entre e islanan. Nos ta desea e aerolinea un trayectoria fructifero moviendo den futuro,” asina AAA su Air Service Development Manager Sra. Jo-Anne Meaux-Arends a bisa.
Cu e tradicional saludo di awa: AUA Airport a yama bonbini na Jetair su buelo inaugural for di Curacao
