Pa fiscal Billy The King Piternella ta culpabel di violacion y maltrato

Billy The King Piternella por bai sinta seis aña den KIA si hues bisa cu e ta culpable di e tur e fechorianan cu Om ta acus’e di a haci cu su amante. Nos ta papia aki di violasion cu e amante, dilanti y patras, maltrato cu skinop y cu arma. Pero tambe menasa.
E homber aki y e muhe tabatin dos aña di relashon, aunke cu e homber ta casa. Pero ta parse cu tur partido tabata sa di otro, inclusive e casa di e acusado. Esaki pasobra e matrimonio tin un relacion habri cu otro, esta nan por haci kico cu nan kier.
Tur lo a cuminsa bon te ora cu a yega na un separacion den luna di januari ultimo y aki, segun e denuncia haci pa e amante. El a sinti miedo cu e homber por hacie algo, aunke ta e homber a kibra e relashon pasobra e ta bisa cu e muhe tabata gañe.
Como cu e tabatin miedo pa e homber sigui haci tur loke e tabata haci den e dos añanan, el a dicidi di bay haci denuncia. Un denuncia cu el a hala atras riba dje, pasobra el a bisa cu e tabata presiona pa su famia.
Pero den e keho entrega na januari el a duna un declarashon amplio con e homber aki tabata maltrat’e, viol’e te scheur su parti patras pa cual e mester a bay hospital ya cu e tabata sangra masha hopi. Tabata e casa di e acusado mes a hiba e amante hospital.
E maltratonan tabata tuma luga cu tur sorto di obheto, inclusive slang diki di wasmashin, rancamento di cabey, el a pone e muhe bebe su pishi, a mar’e na cabuya riba cama, a pone para sunu contra muraya y a pone un loop di arma mey mey di su wowonan. E amante mester raporta serca dje cada 15 minuut cu potret of ubicacion di unda e tabata. Tambe e homber a pone tatuahe rond curpa di e amante, skirbiendo su nomber y mensahenan manera cu e ta donjo di dje. Hasta na su partinan intimo.
Tur cos pero tur cos e muhe a bisa el a laga e homber haci pasobra e tabatin miedo di dje y e homber a bis’e cu e mester castigue pasobra e no a papia berdat cune.
Pero e amante, segun OM pa miedo, a hala atras riba su denuncia y a bisa cu el a gaña. A pidi tur hende disculpa. Ta berdad cu e cosnan a sosode, pero eseynan tabata pasobra e tabata merece e kastigo pasobra e no a papia berdad. El a bisa cu enberdad nan tin un palabrashon cu si e gaña, e homber tin derecho di castigue y esey ta loke a pasa. Den Corte, hasta el a pidi e acusado y e casa disculpa y a bisa cu e stima e homber, y e kier pa wordo poni den den libertad.
Fiscal a bisa cu esaki ta tipico di victimanan cu tin miedo.Ta haci un denuncia y hala atras despues. E homber mes a admiti cu e cosnan a pasa y tambe a bisa cu berdad tin biaha cosnan a bay mucho leu. Fiscal a bisa e homber cu e no tin motibo pa lague bay. AL contrario, e ta haye culpabel y ta kere cu e mester haya castigo di seis añi. Dia 29 di juli tin sentencia den e caso aki.