E decision di WEB pa dia 30 di juni anuncia aumento tarifa di awa a cay manera un sorpresa. Aunke cu e no mester tabata un sorpresa. No ta un secreto cu Awa y coriente mester subi. Aki ta papia di un maneho di utilidadnan di un pais. Sinembargo no ta na Aruba so Awa cu Coriente a subi. Esaki ta desicionnan serio cu mester keda tuma pa un pais, tin ora e ta haci dolor pa e comunidad, pero e realidad di bida y di mundo un dia lo e mester subi, cu si e ta husto of no esey ningun hende no por punta dede. Pero pa un dia despues anuncia cu ta wanta e decision aki temporalmente ta mustra un falta di seriedad y di respet di parti di gerencia di WEB.
Companianan manera di esun Aruba di produccion di awa y coriente ta empresanan di vital importancia pa un pais. Pues ta confia cu e personanan nombra den e puestonan gerencial ta personanan sumamente capacita no solamente pa maneho e compañía, pero tambe na momento di tuma decisionnan.
E hecho cu a tuma un decision mientras cu ta na mesa sinta cu Gobierno ainda, segun palabra di Prome Minister Wever Croes, ta un falta di respet. Con cu bo draai y bisa cu ta trata di un NV, no por kita for di e hecho cu e unico accionista di e NV aki ta Gobierno di Aruba, o sea e pueblo. E unico diferencia ta cu e ta wordo maneha den un forma di negoshi.
Y na momento cu mester tuma cierto decisionnan ta yama un reunion general di accionista y eyden ta discuti e asunto pa tuma un decision y despues anuncia esaki. Den e caso aki a bisa a reuni cu stakeholdernan y ta na mesa cu e unico accionista. Con por ta posibel cu ta tuma un decision e ora sin cu a yega na un palabracion.
SI mir’e di otro banda, cu si por a tuma e decision aki, anto mester para pa e decision tuma. Si hala atras, aunke cu ta temporalmente paso eventualmente e lo mester bin , e ta mustra un falta di profesionalismo. Ta mustra cu por pone gerencia cambia di decision den cualkier otro asunto. Asina sigur no ta algo sano pa un empresa asina importante manera WEB. P’esey e decision tuma pa wanta e aumento / cambio di tarifa ta pone duda den capacidad di esnan cu ta maneha e empresa, si a studia di berdad y debidamente cual ta e miho cambio cu por a introduci.
