Ta tempo pa papia cla y raspa, pasobra maldad tur dia ta avansa y ta domina hopi hende, y tin hopi
hende mara of preso den nan pasado, sin salida pa falta di conocemento di e Berdad, y asina e enemigo
ta ataca hende cu problema di salud mental.
Cada biaha cu nos ta haci cosnan cu Dios ta prohibi, cosnan cu ta bay contra Dios su palabra y su
boluntad e tin consecuencia serio pa nos.
Den Isaias capitulo 43 vers 18+19 Señor ta bisa: No recorda e cosnan di antes, ni tampoco keda pensa
riba cosnan cu a pasa caba. Mira mi ta bay haci algo nobo awor esaki ta bay sali ma cla: Boso no ta
ripara esey, lo mi traha un caretera den tera seco, riunan den desierto.
Señor kier pa nos laga pasado bay , pasobra e enemigo ta usa e peso di bo pasado pa tumbabo y
mantene bo den pica. Mester tin un urgencia den nos bida pa pordona y lubida, pasobra hende cu ta
sconde pica, no ta arepenti, no kier pordona, y no kier laga los for di pasado, lo no madura, ni
prospera.
Y si bo no madura y pordona ta dificil pa bo yega na e proposito di Dios pa bo bida.
Apostol Pablo splica esey hopi cla pa nos den Filipensenan capitulo 3 vers 12 -16 bisando: No cu mi a
alcansa esaki caba, of mi a bira perfecto,ma mi ta haci tur esfuerso, pa mi por gara e loke pa cual ami
tambe a wordo gara door di Cristo Hesus.
Rumannan mi no ta pretende cu mi mes a gare caba, ma un cos mi ta haci: lubidando loke ta keda atras
y aspirando na loke ta dilanti, mi ta haci tur esfuerso pa alcansa e meta,pa haña e premio di e yamada
celestial di Dios den Cristo Hesus.
Hulanda a wordo destrui durante segunda guerra mundial door di Almania, pero nan a madura,
pordona y traha, awe nan tin bon relacion comercial cu Alemania,pasobra nan a laga pasado bay.
Tuma ehempel di hombernan cu a laga nan pasado atras y madura: Hose, Moises, David, Saulo di
Tarso.
Tin hopi hende no sa e diferencia entre huzga y coregi.
E palabra di Dios ta pa coregi hende pa evita cu mayan nan ta cay den e huicio di Dios.
Si bo ta den un grupo di hende y bo conoce e Berdad, y nan ta haci malo, bo no por keda keto, pasobra
bo conoce Dios ( Daniel 11: 32) , bo mester pone nan na altura cu abo no por participa (Daniel
1;8+9). Si un mayor no coregi su yiu awe, tin hopi chens cu mayan cu Dios kier un juez lo huzga y
sentencia su yiu.(Efesios 6:4).
E huicio di Dios ta un cos cruel( Hebreonan 10:30-31), caminda alma di hende por resulta den fierno,
pesey e evangelio ta wordo predica pa coreccion y arepentimento, pasobra ora un hende ta den pica e
enemigo ta pone pensa cu hende ta huzge pa e no scucha e Palabra di Dios.
Hende madura ta balora coreccion, y nan tin un curazon cla pa siña, nan ta cla pa pordona y reconcilia.
Hende madura ta arepenti , cual ta e prome stap pa drenta den presencia di Dios y agrada Dios.
Hende madura ta comparti e evangelio di Dios cu otro nan tur caminda, pasobra nan kier pa tur hende
yega na salbacion.
