Palabra di elogio na tur scolnan cu a participa
Diasabra ultimo den un Compleho Deportivo Guillermo Prospero Trinidad yen di alumno, docente y mayornan a tuma luga clausura di Weganan Escolar 2022. Un atardi di premiacion ameno pa tur e hobennan cu a participa den e prome edicion di Weganan Escolar. Tabata un siman deportivo caminda mas di 800 alumno a participa di 17 di juni pa 25 di juni den ocho diferente disciplina. Durante e ceremonia di clausura a tuma luga final di futbol femenino caminda cu Pius X School a titula campeon na segundo luga a keda scol primario Kudawecha. Y den futbol masculino Mon Plaisir Basisschool a tituta campeon di Weganan Escolar sigui pa Scol Basico Washington. Despues a sigui pa presentacion di baile di e scolnan cu a participa den e competencia di Baile Escolar cu tabata un competencia unico. Parlamentario Shailiny Tromp –Lee hunto cu Minister Endy Croes a entrega premio na tur e ganadonan.
Minister Endy Croes ta gradici IBISA, DCA, Ministerio di Deporte como tambe tur e ‘stakeholders’ cu a haci e Weganan Escolar 2022 posibel. E mandatario a sigui bisa cu e ta satisfecho cu e prome edicion di Wegnan Escolar; scolnan ta contento y alumnonan ta contento. Masha pabien na tur e scolnan y alumnonan cu a participa y haci e prome edicion di Weganan Escolar un exito rotundo. Masha pabien na tur e ganadonan! Keda pendiente pa Weganan Escolar 2023.
