Durante di e siman aki Gobièrnu di Boneiru huntu ku diferente partner kultural i ku sostén di ministerio di OCW ta organisá diferente aktividat enkuanto konmemorashon nashonal di historia di sklabitut
E islanan ruman; Aruba, Boneiru, Kòrsou i isla ariba i Hulanda tin un historia kolonial ku nan ta kompartí pa 149 aña, na mes momentu pa kada isla òf país, e historia ta diferente. Pa e motibu aki a skohe pa durante e aktividatnan, kolaborá ku ekspertonan di otro islanan i paísnan tambe.
Riba 1 di yüli ta konmemorá abolishon di sklabitut den henter reino Hulandes inkluso e aria Karibe e kolonia antiguo ku ta Sürnam.
Lo tene un lektura interaktivo na Papiamentu ku ta karga e nòmber “E Poder Di Nos Historia”. E lektura interaktivo ta tuma lugá na Plaza Beach Resort Bonaire pa 7’or te ku 10’or di anochi.
Durante di e programa tin presentashon di oradónan manera Laurindo Andrea ku lo papia tokante resilensia den pasado, presente i futuro i Max Elstak ku lo hiba un diálogo kaminda lo pone atenshon na e empoderashon di nos komunidat i konsekuensha di e abolishon di sklabititut pa nos islanan.
Tambe tin un presentashon artístiko di Boy Janga, esakinan tur bou di guia di MC Bob Harms.
Bishitantenan por partisipá den e diálogo. Despues di e presentashonnan tin espasio pa kombersá personalmente ku e ekspertonan den un forma informal.
E organisashon di e konmemorashon aki, ta invitá un i tur pa bin habri wikènt den un forma, konsiente i ku kontenido. Debí ku asientonan ta limitá pa e lektura interaktivo, nos ta rekomendá pa reservá adelantá. Por hasi esaki via di e página di facebook di Terramar Museum, via mayafromterramarmuseum@gmail.com òf via whatsapp na 7014700.
Pa mas informashon tokante e diferente aktividatnan den kuadro di abolishon di sklabitut por bishita e página di facebook di Gobièrnu di Boneiru.
