Recientemente a tuma lugar na Centro di Bario Dakota un evento di “Body, Mind & Soul” pa mas of menos 45 pashent di artritis, organiza pa e comision di pashent bou encargo di Caribbean Arthritis Foundation. E biaha aki e pashentnan di artritis a haña e oportunidad pa ricibi informacion valioso pa loke ta trata nutricion anti-inflamatorio y con esaki por contribui na e salud positivamente. Srta. Solange Eckmeyer di Sol y Salud a duna un presentacion interesante pa asina e pashentnan por sigui amplia nan conocimento.
Despues e presentacion a sigui cu un actividad fisico “Qi Gong”, presenta pa Sra. Sofie Slegers di Centro Quivit y Qi Gong Aruba. E actividad aki tabata un demonstracion educativo interesante, unda cu tur pashent di artritis a participa activamente aden.
Caribbean Arthritis Foundation ta sigui enfoca riba e “early diagnosis awareness program” y tin entre otro como reto pa mehora e posicion di tur pashent di atritis y tambe esnan cu no ta sigur di tin e condicion aki, door di regularmente organisa actividad riba e topico pa e pashentnan. Asina nan por tin e oportunidad pa comparti nan experencia cu otro pashentnan durante varios actividad planea y asina contribui na un miho calidad di bida. Un danki special ta bai pa e Nationale Vereniging ReumaZorg Nederland, cu a hasi e sesion di informacion aki posibel.
Proximo luna e comission di pashent tin un otro actividad interesante riba programa. Pa mas informacion, libramente bishita e website: www.cafaruba.org of FaceBook Caribbean Arthritis Foundation.
