Ban saca forsa pa hunto nos hiba Aruba padilanti
Na fin di siman y riba e dia festivo di San Juan y Dera Gay, Prome Minister Evelyn Wever-Croes ta encurasha pueblo di Aruba pa enfoca riba cosnan positivo cu tin rond no obstante e temponan dificil cu mundo y pueblo di Aruba tambe ta pasando aden.Cu positivismo lo logra haci di nos pais, un pais fuerte y resiliente.
Prome Minsiter:
“Aruba ta pasando ainda den temponan dificil. Berdad nos a sali di Covid pero aworaki mundo y nos pais a cay den un crisis nobo, e conflicto di Ukraina cu a causa e aumento drastico di prijsnan di crudo, gasoline y productonan petrolero. Nos ta importa practicamente tur cos, esey kiermeen nos ta importa e aumento di prijsnan di otro paisnan y consecuentemente aki na Aruba tambe costo di bida a subi.
Ora costo di bida ta subi asina, nos ta encontra cu temponan dificil y hopi biaha nos por perde enfoke. Pero mi ta kere ta importante pa nos cada uno keda enfoca riba cosnan positivo den nos bida. Wak rond di bo cuanto cos positivo tin den bo bida.
Talbes mi por yuda bo cu un algun cos positivo cu awe ta pasa den nos pais. Siman pasa tabata tin 923 caso activo di Covid na Aruba y awe nos ta na 469 caso activo. Esaki ta algo hopi positivo. Esaki no kiermeen cu Covid a bay. Ainda tin 469 persona cu Covid, 9 persona den Hospital y 1 den ICU. Pero e un noticia aki ta un indicacion cu nos tin e situacion ainda domina.
Otro noticia positivo ta e prome paso cu a wordo tuma awe, diabierna 24 di juni, den Conseho di Minister di Reino. Gobierno por cuminsa prepara pa paga e 5% otro luna na tur esnan cu ta traha pa Gobierno y esnan cu ta traha pa fundacionnan cu ta wordo subsidia pa Gobierno.
Y asina, den bida di cada un di nos, tin cosnan positivo rond. Ta keda na nos si nos kier wak e positivism of si nos kier keda lesa, scucha, wak y kere noticianan eyfo cu ta hopi negativo y ta pone nos pueblo den luz negativo tambe.
Aruba tin mester di nos tur, ainda tin mester di nos tur. Hopi di nos ta cansa ta berdad. Pero ban saca forsa manera nos a haci semper manera Arubianonan cu ta stima e baranca aki, cu ta orguyoso di e pida baranca aki, cu ta stima nos famia y nos pais, ban saca forsa di eynan pa hunto nos hiba Aruba padilanti.
