Den cuadro di e campaña 3C-TRECE:
E campaña 3C ta den full swing y e siman aki Minister di Cultura Xiomara Maduro encarga cu Archivo Nacional Aruba a ricibi for di Minister di Salubridad Publico y Turismo Dangui Oduber y Relacionista Publico di Departamento di Salubridad Publico Jurette Croes, tur material informativo y di guia cu a wordo produci y uza durante e pandemia di Covid19 na Aruba. E pandemia no a bini cu un manual y ta pesey mas cu claro e esfuerso cu a wordo hinca pa produci informacion pa por guia e pueblo di Aruba den henter e pandemia, ta informacion valioso cu por sirbi como guia tambe pa si despues algo pasa na Aruba, nos lo sa con pa cana.
Despues cu Minister Xiomara Maduro a ricibi e USB stick cu e informacion for di Minister Dangui Oduber y e documentonan di entrega y ricibimento a wordo firma pa ambos mandatario, na su turno Minister Maduro a entrega esaki na director di Archivo Nacional Aruba Raymond Hernandez.
Minister Xiomara Maduro ta gradici su colega Dangui Oduber y ful e team di Departamento di Salubridad Publico pa esaki y tambe Archivo Nacional kende awo lo perura pa e informacion keda archiva y tambe pa e informacion keda exponi na pueblo general pa mira tur esaki. Minister Maduro ta invita comunidad como tambe instancianan pa participa den e Campaña 3C-TRECE pa yuda colecta y entrega nan materialnan historico den forma di documento, potret, material audio-visual y digital, pa asina nos conoce historia di nos Pais y cu esaki por wordo conserva pa nos futuro generacion.
