Tin otro tipo di casonan den henter e mundo di ilegalidad na Aruba. Nos tur sa di e situacion cu tin na Venezuela y Colombia cu nan gobiernonan. Sinembargo tambe mundo a confronta su mes cu e situacion di COVID. Hulanda ta na altura di tur e situacionnan aki y a duna Aruba placa pa structura y atende e situacion di personanan cu berdaderamente mester di un Asilo Politico. Sin embargo na Hulanda tambe tin hopi problema cu situación di Asilo. Pero no ta un secreto cu Hulanda a manda placa, pero kico realmente a wordo haci cu e placa aki destina pa trece un departamento pa atende extrictamente peticionnan di Asilo politico?
Tur persona rond Mundo tin e derecho di pidi un Asilo Politico, pero cu e Asilo Politico aki ta conta pa nan, e departamento cu Hulanda a manda placa pe cu mester investiga y controla esaki ta nan tarea pa averigua e peticionnan y si tur documento ta legal y loke cu e inmigrante cu a pidi Asilo Politico ta cuadra cu berdad si of no.
Articulo 19 di e toelatingbeleid cu a ser kita door di ex minister di husticia Andin Bikker ta papia specifico con mester trata un peticion di Asilo Politico na momento cu e Inmigrante drenta un pais. Aki ta trata di un tratado internacional cu por ehempel loke ta pasa na Venezuela si e inmigrante tin problema cu su gobierno y of cu e por ser mata si e sigui den e pais, tambe inmigrantenan di Ucrania por ehempel, por haci peticion pa Asilo Politico mirando cu tin guerra na e Pais.
E ley ta bisa na 2009 esnan cu ta pidi Asilo Politico gobierno mester por duna e inmigrantenan aki un espacio pa nan por traha y pa nan cumpli cu pagamento di impuesto na e pais. Sinembargo ex minister Bikker a kita e articulo y ta pone cu e inmigrantenan cu ta pidi Asilo Politico den un spot pa keda haci cosnan ilegal na un Pais.
No por ta posibel cu un persona cu ta haci su tramite di Asilo na Aruba pa dos aña y pa dos aña e no lo por traha y consecuentemente e no por come ni biba. E sistema actual ta drey y obliga e inmigrantenan di keda comete mas actonan ilegal na Aruba.
E proceso aki ta trata specificamente pa inmigrantenan cu a yega Aruba y pidi Asilo Politico. Nos no mester bruha dos cos den otro, un inmigrante cu ta drenta como turista y ta keda ilegal na Aruba ta completamente diferente y mester keda trata completamente diferente cu un Inmigrante cu ta yega Aruba y ta pidi Asilo Politico na momento cu e drenta. Esakinan ta dos escenario full diferente y cu nan proceso mester keda trata diferente tambe tanto na DIMAS y na GNC.
E articulo 19 cu a ser kita na Aruba ta existi ainda na Hulanda y e ta na vigor te ainda. E mesun ley ey tin’e na Merca tambe den su mes un espirito hancra den e leynan Mericano y e ta den werking unda cu ta evita cu e inmigrante ta keda den bo Pais sin por aporta na economia y belasting.
Loke ta un realidad tambe ta cu na momento cu DIMAS desaproba e peticion di Asilo Politico pa un manera of otro e persona ta perde tur derecho y mester bandona Aruba mesora, pero cu nan ta hacie ta otro pregunta, aki ta caminda Aruba ta keda cu persona nan cu ta bira ilegal y ta contra ley. Importante ta pa crea un manera cu na momento nan asilo político no ta a keda aproba door di cualquier motibo pa e personanan aki sali for di Aruba.
Tambe loke hopi biaha ta pasa ta cu na momento cu un inmigrante drenta Aruba como turista y ta bira ilegal durante tempo e ora nan kier busca Asilo Politico. Esaki ta loke cu tampoco no por. Den e Articulo 19 mes ta bisa cu e Asilo Politico por ser pidi solamente na momento cu bo mishi e frontera dus na momento cu ta dilanti di e boet di Inmigracion.
Na e momentonan aki debi cu a kita e articulo 19 a pone cu e Venezolanonan no mester pidi e Asilo na e frontera , pero nan ta pidie ora nan haya nan gana. E eror di ex minister Bikker di POR a crea un situacion na momento cu a kita e articulo 19 cu e inmigrantenan por haci peticion pa Asilo Politico siendo di ta un ilegal na Aruba. Esaki ta e situacion real cu Aruba ta bibando na e momentonan aki.
Aruba tin un minister di Husticia y di Integracion nobo. E ultimo aki cu lo mester duna permiso na Minister di Husticia pa haci cambionan den ley pa asina e operacion di Guarda Nos Costa por ta util pa Pais Aruba. Si e dos mandatarionan aki tin e mes un vision pa Aruba nan por logra trece un cambio y si no ta asina e consecuencianan un biaha mas nos como ciudadano di Pais Aruba lo mester carga e consecuencia di nan decisionnan politico. Editorial