For di varios siman caba departamento di cultura y ministerio di cultura a traha hunto pa duna informacion pa educa nos muchanan di e tradicion di Dera Gay.
Cas di cultura tabatin un siman yen cu diferente scolnan cu a participa unda cu mas di 5 mil mucha por a haya informacion di e fiesta tradicional di San Juan Dera Gay.
Minister di Cultura Xiomara Maduro tabata presente y ta duna di conoce cu e tabata un siman informativo pa e muchanan sa mas di locual ta nos fiesta tradicional di cosecha San Juan Dera Gay. Depratamento di cultura a percura pa un cantidad grandi di scolnan primario y preparatorio bin cas di cultura y disfruta. Minister Xiomara Maduro a comparti hunto cu e muchanan, e sala tabata yena cu mucha contento y cu e mainta aki tabata un mainta educativo pa cada uno cu tabata presente den e sala.
Na final di e dia Minister Xiomara Maduro a presenta e caha sabi cu cada scol a haya unda cu den e caha tin hopi informacion y material cu e scol a haya pa sigui cu e tradicion tur aña na scol. Mas mucha sa di e dia di San Juan mas nan lo aprecia kico ta di nos. Den e caha tin e palo cu ta baila cu ne, mitar calabas , sinta pa mara wowo, buki di informacion y bukinan pa e muchanan pinta.
Cultura ta forma caracter di un mucha pesey ta importante cu di chikito siña e mucha kico ta su cultura,kico ta nos tradicion, con ta nos manera di anda cu otro , laganan participa pa nan sinti y siña mas paso esey ta locual ta cultura.
Un danki ta bay na tur docente tambe cu a participa na e dia cultural y informativo aki y a permiti pa e muchanan haya e enseyansa mereci.
