Ta rekerí partisipashon di tur interlokutor sosial pa apoyo i un implementashon efektivo
E reformanan nesesario den organisashon i finansiamentu di e sektor di kuido pa hasi e sektor aki mas flèksibel i resiliente a largo plaso, konforme loke a ser akordá ku Hulanda den e Pakete di Pais (Landspakket), tin posibilidatnan grandi di éksito si ta eksistí un grado altu di sentido di urgensia, enfoke i un kompromiso inkondishonal di tur aktor envolví, inkluso e partnernan sosial representá den Konseho Sosial Ekonómiko (SER). Un strategia di komunikashon efikas, ku ta rekonosé diálogo sosial komo hèrmènt pa optené apoyo i un alto grado di kompromiso i aseptashon pa ku e reformanan ku tin un impakto sosioekonómiko, por kontribuí di un forma balioso na alkansá e ophetivo ei.”
Esaki ta un di e konklushonnan prinsipal ku a yega na e durante un seshon informativo ku SER a risibí djabièrnè, dia 17 di yüni último, di un delegashon di e organisashon di maneho di ministerio di Salú, Medio Ambiente i Naturalesa (GMN), asistí pa un ekipo di ekspertonan di e Organisashon Pan-Amerikano di Salú / Organisashon Mundial di Salú (PAHO/WHO), despues ku SER a risibí djárason, dia 15 di yüni último, den Hotel Renaissance, riba rekomendashon di ministerio di GMN, un presentashon amplio riba reformanan den sektor di salubridat públiko i kon PAHO/WHO ta brinda asistensia tékniko na e proseso aki. E presentashon aki tabata kontinuashon di e reunion ku SER tabata tin ku Minister di GMN, Sra. Dorothy Pietersz-Janga, djabièrnè dia 3 di yüni último, durante kua a duna un splikashon mas detayá riba e proposishon pa redusí e pakete di Seguro Básiko di Salú (BVZ), ku de minister a presentá na SER pa konseho.
Na base di e reformanan den sektor di kuido, di kua algun ya kaba ta den fase di implementashon, tin e strategia di intervenshon den kuater fase manera aprobá dor di Konseho di Ministernan (KdM) durante e promé kuartal di e aña aki, pa garantisá sostenibilidat di e sistema di kuido na Kòrsou manera proponé den e informe “Kopzorgen over de zorg” di 26 di yanüari 2022. E strategia di intervenshon den kuater fase ta konstituí base di maneho di e gabinete aktual pa hasi sostenibel: kalidat, aksesibilidat i finansiamentu di kuido médiko na Kòrsou.
E motibu prinsipal pa e strategia di intervenshon den kuater fase aki, manera aprobá dor di KdM, ta e gastunan operashonal haltu di hòspital nobo (Curaçao Medical Center, CMC). E motibu indirekto di e strategia tin di aber ku garantisá a mediano plaso sostenebilidat di kontribushon di pais (Landsbijdrage) na e fondo di BVZ.
Durante e presentashon na SER, djárason dia 15 di yüni último, e ekspertonan di PAHO/WHO, basá riba nan konosementu tékniko i den nan ròl komo asesor di ministerio di GMN, a duna nan vishon riba kon, i na ki punto, Kòrsou lo por uza e aserkamentunan metodológiko ku a keda demostrá di ta efisiente, basá riba investigashonnan empíriko komparativo di paisnan, en partikular paisnan den region di Karibe i Latinoamérika, pa redusí oumentu di gastunan di kuido manteniendo e sektor di kuido aksesibel, pagabel i di kalidat altu.
E seshon informativo na SER di djabièrnè dia 17 di yüni último a konsentrá su mes prinsipalmente riba viabilidat práktiko di e enfokenan metodológiko den e konteksto spesífiko di Kòrsou i riba e kondishonnan primordial nesesario ku mester kumpli kuné pa oumentá grado di éksito i un implementashon efektivo. A rekonosé e nesesidat di kompromiso sosial kontinuo, en partikular di e partnernan sosial.
Riba e potrèt: sintá na e mesa prinsipal: presidente den funshon di SER, sr. mr. John Jacobs i kabesante di e tim di eksperto di PAHO/WHO dr. Erica Wheeler. Pará nan tras: algun miembro di SER, kompañá pa ekspertonan di ministerio di GMN i esnan di PAHO/WHO.