Registro Sivil ta habri mas ora pa yuda siudadano sin sita

Registro Sivil ta habrí djaweps speshal pa yuda esnan ku no tin sita ainda. Lo habri for di 3’ór di mèrdia te ku 7’or di anochi.  

Algun tempu kaba departamento di Registro Sivil  ta enfrentá problema pa inkorporá e sistema digital di traha afsprak den e servisio na públiko. Esaki a resultá den kehonan riba e tempu largu ku mester warda promé ku suidadanonan por traha un sita pa nan petishon na Registro Sivil. Esaki ta kondusí na e fenómeno ku suidadanonan ku ya kaba a traha un sita digitalmente, ta akudí tòg na Registro Sivil pa por entregá nan petishon. Huntu ku e suidadanonan ku ta bini sin sita, esaki ta okashoná ku ta surgi reinan di espera largu parti pafó na Registro Sivil.

Komo entidat públiko nos ta haña e desaroyo akí inaseptabel i fastioso pa tur hende enbolbí. Pa e motibu akí durante e periodo tras di lomba internamente nos a tuma algun medida pa redusí e tempu di warda i e reinan dilanti e edifisio di Registro Sivil i pa por yuda bo komo suidadano den un forma mas rápido i adekuá posibel.

For di 16 di yüni temporalmente ta habrí èkstra for di 3’or di mèrdia te 7’or di anochi or pa por yuda suidadanonan ku no tin sita. Banda di esaki nos lo bai hasi uso di personal èkstra pa por atendé ku e kantidat grandi di bishitante durante e periodo binidero.

Pa evitá ku tòg ta surgi rei largu di espera, nos ta supliká bo komo suidadano pa tene kuenta ku lo siguiente:

• Sòru pa bo tin tur e dokumentunan òf papelnan nesesario huntu ku bo ora bo ta bai Registro Sivil pa hasi un petishon. Promé ku bo bishita, pa kada produkto òf petishon bo por lesa kua ta e dokumentunan ku bo tin mester pa laga tuma esaki den tratamentu;
• Den kaso ku ya kaba bo tin un sita digital, e ora ei tene bo mes mas tantu posibel na e sita akí. Si sinembargo pa motibu di por ehèmpel un karakter di urgensia no por otro,  e ora ei bo tin ku indiká na bali di Registro Sivil ku bo tin un sita kaba i laga anulá / kita e sita akí despues. 
• Trata otro ku rèspèt i sigur nos empleadonan. Si bo no por hasi esei, nos ta mantené e derecho pa nenga bo nos servisio.

Ku e medidanan menshoná akí riba nos ta spera ku nos por yuda bo komo siudadano mas mihó posibel pa optené e dokumentunan òf servisionan ku bo tin mester. Lo hasi máksimo esfuerso pa gana konfiansa bèk di públiko.