En conexion cu Dia Mundial di Donante di Sanger,
“Danki na e 1500 donante actual cu merece elogio pasobra nan ta salba bida”
14 di juni ta Dia Mundial di Donante di Sanger. World Health Organisation (Organisacion Mundial di Salud) a instutui e dia special aki na 2004 dedica na donante di sanger cu e obhetivo pa crea conscientisacion riba e importancia y necesidad grandi pa duna sanger. E slogan di e aña aki ta “Duna sanger ta un acto di solidaridad. Afilia bo mes na e esfuerso y salba bida”.
Prome Minister Evelyn Wever-Croes diamars mainta a haci bishita na Bloedbank especialmente pa gradici e trahadonan como tambe tur donante di sanger. Bloedbank ta un entidad sumamente profesional cu trahadonan cu ta haci nan trabou cu hopi entusiasmo.
Durante su bishita, Prome Minister a haya un rondleiding na unda cu el a keda impresiona no solamente cu e facilidad y ekipo, pero tambe cu e profesionalismo y positivismo cu ta reina den e trahadonan. Prome Minister den su palabranan dirigi na e ocasion, a gradici trahadonan di bloedbank pa e bunita trabou cu nan ta haci den yuda salba bida.
Prome Minister a remarca cu tin necesidad grandi na Aruba pa haya mas donante. Un urgencia pa mas ciudadano bira donante di sanger. Na Aruba tin mas o menos 1.500 donante so di sanger. Sinembargo tin mas o menos 2500 pa 3000 persona cu mester di haya un transfusion di sanger na Aruba. Esaki claramente ta un indicacion cu no tin suficiente donante di sanger pa e cantidad di persona cu tin mester di sanger sea pa motibo di malesa, accidente of operacion.
“P’esey awe, mi kier haci un apelacion na henter e comunidad di Aruba pa nos cada un averigua pa mira si nos por bira donante. E deseo ta pa redobla e cantidad di donante. 1500 donante actual merece elogio pasobra nan ta salba bida y ta wordo yama mas di un biaha pa aña pa duna sanger. Danki na cada un di boso. Pero, ki ubo si cada ciudadano cu por duna sanger, duna di su parti y sea parti di esnan cu ta salba bida. Nunca nos sa bida di ken nos ta salba, pero e por ta di un ser stima”, Prome Minister a expresa.
Prome Minister a haci un apelacion tambe na doñonan di trabou pa stimula trahadonan pa duna sanger y duna nan e espacio tambe pa acudi na Bloedbank pa duna sanger. Ya caba algun ta haciendo esaki cu ta di hopi aprecia.
“Den e tempo aki di recuperacion, ban ta mas boluntario y duna mas na nos pais y hiba nos pais padilanti. Desde 18 aña bay ariba, bo por ta un donante. Acudi na Stichting Bloedbanki pa haci e procedura pa bira donante y sea parti di esnan cu ta salba bida”, Prome Minister a enfatisa.
