Atrobe ata nos ku e problemátiko di produkto kaduká. Durante e último 10-12 añanan ta den diferente supermerkado, toko, restorant i agensia a konstatá ku tin produkto kaduká na benta.
Den un kaso resien, a konstatá un kantidat basta grandi di produkto kaduká atrobe riba merkado. Ke men ta kiko a kambia durante e último 10-12 añanan?
Sigun mi nèt nèt nada. Ban bek n’e kaso aktual.
Ta diferente negoshi tabata warda nan merkansia den e frizer dje Agensia konserní. A saka en total 29 mil Kilo di produkto kaduká. Pa ta eksakto : 29.330 Kilo. Produktonan ku ya a pasa fecha. E gerente dje agensia a sali pidi despensa en toen was het stil….
Produktonan di kual nan fecha di vensementu a kaduká ya pa basta ratu, ta un peliger pa nos salú públiko. Bendementu di produktonan bieu/kaduká, tambe ta un akto kastigabel pa lei. E ta un abusu di marka mayó i por hasta keda denominá komo algu kontra di derecho humano. Ta p’esei m’a ferwagt ku masha dia Ministerio Públiko (OM) riba su mes lo a kai “ambsthalve” den e kaso aki, paso ta henter un komunidat a keda di shòk.
Mi ta tribi di bisa : Komementu di produkto kaduká/kontaminá, ta e ardu mayó di malesa bou di nos habitantenan. Bosnan eifó no a ripara ta kuantu malesa nos tin últimamente ? Kuantu trahadó ta bati “absent” ( AO ) riba malesa ? Malesa ku ta kousa tristesa i ta kosta henter nos komunidat plaka.
Ata SVB so ta paga alrededor di 20 mion pa aña na plaka di malesa. Ke men hasta e ekonomia dje pais ta wòrdu afektá.
Ta diferente bakteria e karni òf produkto kaduká por introdusí den kurpa di hende : salmonella, staphylococcus, clostridium i E. Coli. Tambe ta diferente enfermedat e karni kaduká/daña por kousa, den kual algun di nan hasta enfermedat ku por kondusí na morto : anthrax, bovine tuberculosis, brucellosis, salmonellosis, listeriosis, trichinosis or taeniasis.
Djis pa menshoná algun síntoma ku por kuminsá algun minüt despues di kome e produkto kontaminá, te algun siman despues :
Doló di stoma, Sakamentu, Doló di tripa, Diarea, Keintura, Doló di múskulo, Doló di lomba, Doló den bo wesunan
Problema ku preshon, Problema ku konsentrashon, Tur sorto di alergia, Doló di kabes, Fatiga : kansansio, e kurpa sin energia
Den kasonan mas grave e por hasta afektá bo pulmon, bo Kurason òf bo selebro i tin biaha finalmente ku resultado fatal.
Normalmente por warda karni den frizer na un temperatura di 0 grado Celsius pa 1-3 aña. Pero tin biaha e trayekto dje karni ku a bini for di eksterior, ke men for di e produktor te na e konsumidó, ta deskonosí. Si den e trayektorio di warda e karni, e frizer daña òf pa un òf otro motibu koriente a bai anto e karni difròst, e periodo ku ta safe pa warda e karni ora bolbe vris e ta di algun dia. E ora ei no por papia di un karni ku bo bor warda den un forma safe pa algun aña den frizer. Paso mi a bin ta skucha ku t’esaki ta un dje argumentunan ku ta wòrdu usa dor di esnan ku a keda gara.
Gobièrnu mester kuminsá sertifiká importashon di produktonan solamente si e ta bini di produktornan sertifiká mundialmente i ku un trayektorio di konfiabilidat.
Kita e kuestion di “Broker” mei mei ku ta kore buska un bon “deal” den e merkado pretu di produktonan.
Hasta riba Internet, den “dark web” bo ta haña tur kos ilegal i mas barata. T’aki nan bo ta haña e produktonan ku fecha di vensementu ku ta muchu mas barata. Ora e kònteiner yega haf, laga un “team” di inspektor di departamentu di salu públiko kontrolá e kònteiner. Asin’aki bo ta yuda prevení ku produktonan di kual e fecha a vense ta keda importá den nos komunidat.
Mi tin e siguiente preguntanan pa sra. Minister di salubridat.
- A keda pendiente pa por haña lista di tur e klientenan di e Agensia konserní, pa asina por bai kontrolá nan tambe. Pregunta, a bai kontrolá nan kaba anto si e kontesta ta afirmativo, kiko tabata e resultado dje control?
- Manera m’a bisa, e gerente dje agensia a sali den medio di komunikashon i pidi despensa na pueblo di Kòrsou. Un bon komienso. Pero mi ke sa ta ken ta bai para responsabel den kaso di un posibel daño n’e salu di nos pueblo ? Ta ken ta bai para finansieramente responsabel p’e daño mental i físiko k’e konsumidó a sufri ?
Klaro ku e pueblo mester ta konsiente ku mester kontrolá e produkto su fecha di vensementu promé ku paga p’e. Pues banda dje responsabilidat di Gobièrnu, e konsumidó tambe tin un responsabilidat. N’e otro un banda, imaginá ku a falsifiká e fecha di vensementu.
E ora ei ta eliminá e último forma di kontròl. E último kòntròl promé ku e konsumidó paga p’e produkto, bai kas i usa e produkto.
3.Pregunta, kon ta kontrolá si tin produkto kaminda e fecha di vensementu a wòrdu manipulá ? Esaki tambe ta wòrdu kontrolá ? Den e kaso resien aki, tin kaso kaminda e fecha di vensementu a wòrdu manipulá ? Paso un kos ta bende un produkto ku fecha kaduká, pero pió ainda ta ora bai manipulá ku e fecha paso e ora ei bo ta dòbel “strafbaar”. Ta konsientemente gaña e konsumidó p’e kumpra e produkto kaduká. Ta hasi mal uso dje konfiansa dje konsumidó. E kos aki ta “valsheid in geschrifte” i ta wòrdu kalifiká komo un krímen. Akinan por apliká artíkulo 24 dje ordenansa di Waren ( 1997 ) i por traha un “proces verbaal” pa Ministerio Públiko kai aden mesora. E “strafbepaling” den e ordenansa aki ta 4 aña di prison òf 1 mion florin di but.
Por último, un sugerensia na Gobièrnu pa introdusí un “Hotline” kaminda e pueblo por yama hasi denunsia na momentu ku nan nota un infrakshon. Ke men un arma adishonal banda di Fundashon di konsumidó. Un “Hotline” kaminda por hasi denunsia den un forma anónimo.
