E hóbennan ku a partisipá na “Sociaal Vormings Traject (SVT)” “Un Komienso Nobo” na Kazèrne di Marina Suffisant a risibí nan barèt. E grupo di hóbennan aki, bou di guia di Defensa a kuminsá riba dia 1 di Mart ku promé fase di e estudio. Durante un periodo di kuater luna nan a siña den un forma militar norma i balornan tal komo disiplina, rèspèt propio, struktura, resistensia, konfiansa i sentido di responsabilidat.
Un grupo di hóben riba djaweps 9 di yüni 2022 por a risibí nan barèt ku nan a meresé huntu ku nan sertifikado durante un seremonia kòrtiku ku tur e partidonan envolví. Presente tabata entre otro Minister Presidènt Pisas i e Komandante di Forsanan Naval den Region Karibe, General di Brigada di Marinier Frank Boots.
Siguiente Fase
E promé grupo di hóbennan lo start mes ora ku e segundo fase, e trayekto di aprendisahe (Leerwerktraject (LWT), bou di guia di e organisashon ehekutivo Fundituut. Durante e fase aki e hóbennan ta kontinuá ku nan preparashon pa un funshon ku ta pas pa nan riba e merkado laboral, di akuerdo ku nan kapasidatnan. Ku e dos fasenan aki Gobièrnu di Kòrsou huntu ku Defensa ta brinda perspektiva pa futuro na e hóbennan aki.
Realisashon di e Koperashon
E proyekto aki ta keda realisá den e kuadro di palabrashonnan entre Kòrsou i Hulanda, rondó di reformanan den e ‘Landspakket’. E reforma aki ta inkluí bou di e tema ‘H18’ i ta ser designá komo Programa di Formashon Sosial/‘Sociaal Vormings Traject’. Ministerio di Hustisia, Ministerio di Desaroyo Sosial, Labor i Bienestar (SOAW), Ministerio di Edukashon, Siensia, Kultura i Deporte (OWCS) i Ministerio di Defensa, tur ta partner den e proyekto aki.
Ougùstùs ku ta bini un SVT nobo ta bai kuminsá. Ainda tin espasio pa esnan interesá. Bo tin entre 18 i 24 aña, bo por manda un mensahe pa mas informashon na unkomiensonobo2022@gmail.com òf via WhatsApp na +5999 526 7369.
