Mi talento pa mi Pais

Minister di Enseñansa Siensia Kultura i Deporte (ESKD), Sr. Sithree van Heydoorn, ta partisipá na pueblo di Kòrsou ku Festival di Kanto: ‘Mi Talento pa Mi Pais’ ta bai ranka sali.  Gobièrnu di Kòrsou ta habri e oportunidat pa pueblo di Kòrsou demostrá nan talento den kanto. E Festival aki ta keda organisá den e di tres siman di yüni 2022. Ganadónan di e festival ta presentá Dia di Bandera 2022, 2 yüli riba Plasa Brion.

E intenshon ta pa mas tantu talento nobo di kanto posibel bini dilanti i tambe pa selebrá nos kansionnan eksistente i asina honra nos artistanan nashonal. Pues por interpretá un kansion eksistente di un artista lokal òf bo por tin un kansion original ku ta alsa patriotismo. Tur persona ku tin talento di kanto i ke dediká esaki na nos pais ta keda kordialmente invitá pa registrá. Gobièrnu di Kòrsou ta habri e oportunidat pa pueblo di Kòrsou demostrá talento den kanto pa stimulá patriotismo. E Festival akí ta keda organisá den e di tres siman di yüni 2022 i ta na honor di nos Bandera.

Pa partisipá mester tene kuenta ku e kriterianan di partisipashon i tambe e kategorianan ku tin pa ku edat.

E kriterianan pa e kansion eksistente ta lo siguiente:

1. E kansion mester ta di un artista lokal;
2. E kansion mester ta na Papiamentu;
3. E kansion ta un kansion popular;
4. E kansion mester stimulá patriotismo;
5. E kansion mester tin un ritmo krioyo kulrural.

E kriterianan pa e komposishon nobo ta lo siguiente:

1. E kansion ta na Papiamentu;
2. E kansion ta stimulá patriotismo;
3. E areglo mester ta den un di nos rítmonan kultural manera wals, mazurka, dansa, seú, tumba;
4. Largura no por ta mas ku kuater (4) minüt.

E 3 kategorianan di edat ku por partisipá pa kompetí ku sea un kansion original of un kansion eksistente ta:

• di 7 pa 12 aña di edat;
• di 13 pa 17 aña di edat;
• di 18 aña bai ariba.

Lo tin premionan fantástiko pa tur ganadó den kada kategoria tantu interpretando un kansion di un nos artistanan lokal na Papiamentu òf presentando bo propio komposishon. E kategorianan ta keda husgá separá. Na final ta saka esnan ku ta bai interpretá nan kansionnan riba Dia di Bandera 2022.

Gobièrnu ta invitá Pueblo pa ban sigui halsa nos nashon pa medio di kanto. Djòin Gobièrnu di Kòrsou den e kompetensia Festival di Kanto: MI TALENTO, PA MI PAIS. Kaminda pueblo di Kòrsou kompleto ta sigui Kanta pa Kòrsou.

Pa mas informashon i registrashon yena e formulario di di registrashon i mail na:  Cultuur01.ucs@gmail.com òf por manda un whatsapp na +5999 513 6973. Registrashon ta sera dia 16 yüni 2022.