Hopi hende ta pensa cu cultura ta evenementonan rond di por ehempel dera gay, carnaval y 18 di maart. Pero cultura ta hopi mas, e ta e forma di biba di hende, cada expresion humano. Esaki ta importante pa sa paso e ta yuda nos realisa cu ya caba nos tin hopi cultura presente na San Nicolas. Tin musica, artesania, cuminda, religion, museo y monumento. Na Aruba nos tin e tendencia di no gosa suficiente di tur e bendicionnan cu nos tin, incluso nos cultura. Nos tin cu reconoce, aprecia y celebra tur forma di cultura cu nos tin.
San Nicolaas: Nos Culture Heritage City
Dimes tin hopi espacio pa amplia actividadnan cultural pariba di brug. Den mi opinion mas actividad cultural, lo trece mas hende hunto, trece mas union y ta trece oportunidad pa comercio crece. Ademas, mas actividad positivo y crecemento economico lo eventualmente causa mas siguridad den e barionan. Cu e idea aki den mente mi a presenta un mocion dia 4 di April 2022 unda mi a urgi gobierno pa (sigui) inverti den San Nicolas como ‘cultural heritage city’. E idea tras di e mocion aki ta pa gobierno inventarisa cua actividadnan cultural por wordo organisa pariba di brug (tambe) y yuda promove actividadnan di organisacionnan no gubernamental.
Plan pa desaroya cultura na San Nicolaas
Ayera hunto cu coleganan Ricky Hoek, Darlaine Guedez-Erasmus nos a reuni riba e topico aki cu representantenan di comision di cultura y enseñansa di Departamento di Cultura. Mirando cu e desaroyo aki lo rekeri esfuersonan riba tereno di cultura, infrastructura, social y turismo, ta esencial pa existi un bon colaboracion entre diferente ministerio. Nos a palabra cu como parlamentario nos lo pidi gobierno atencion pa esaki. Fin di juni departamento di cultura lo presenta un concept plan con pa desaroya cultura pariba di brug.
Mi ta gradici Siegfried Dumfries, Angeline Maduro, Lisette Maduro y Jose Miguel Donata pa un reunion fructifero y tambe nos Minister di Cultura sra Xiomara Maduro pa tuma accion mesora pa cu e mocion presenta. Di mi parti lo mi keda pendiente pa e concepto cu lo keda presenta na nos y asina tambe sigui crea e caminda pa stimula y desaroya San Nicolaas den nos Culture Heritage City.