Prome Minister Evelyn Wever Croes den conferencia di prensa a elabora riba e situacion di COVID na Aruba. Actualmente ta pone un Update di cifranan di Covid un bes pa siman y diabierna ultimo e cifranan ta mustra cu Aruba tin 701 caso activo, e siman prome e cifra tabata 326, esaki ta mustra cu den un siman e casonan a redobla.
Tambe a tuma nota cu tres persona mas a fayece door di COVID 19 e siman cu a pasa. Tambe por a compronde cu ta trata di personanan cu ya caba ta delicado di salud. Si mester mira e cifranan di cerca Aruba tin un cantidad di 134 caso nobo pa dia y e positive rate ta 46%.
Segun Prome Minister Evelyn Wever Croes esakinan ta motibo cu tin gobierno preocupa. Di otro banda ta mira cu tin 10 persona hospitalisa di cual uno ta den cuido intensivo. E siman prome tabata 4 persona den hospital y awor e la bira 10, pero e simpel echo cu tin solamente 1 persona den cuido intensivo y e cantidad aki ta stabiel den e ultimo siman nan ta mustra cu Aruba tin e situacion ainda bao di control.
Sinembargo mirando e casonan cu ta aumentando den nomber di crisis team kier alerta comunidad pa tuma e pasonan necesario pa reduci e transmicion di COVID 19. No mester warda gobierno pa bin cu medidanan pa cuidabo, pero esaki ta e momento cu bo mes mester cuida bo mes y esnan cu ta rond di bo.
Segun Prome Minister Evelyn Wever Croes legalmente basa riba ley cu un persona so ta den cuido intensivo gobierno no tin e base legal pa impone medidanan di ley pa bay controla y parti boet si hende no cumpli cu nan.
Gobierno di Aruba ta haci un apelacion na comunidad di Aruba pa abo como ciudadano cuida bo mes, bo famia y tur esnan cu ta rond di bo. E datosnan ta preocupa gobierno y esnan cu ta awor aki ta den e grupo di 701 e edad ta entre 40 -50 aña. Esaki no ta keda considera un edad hopi halto y no di riesgo.
Sinembargo ta mirando si cu e edadnan ta bahando y ora e edad ta baha y ta yega na edad di nos hobennan y muchanan, esaki hopi facil e por keda transmiti pa adultonan, specialmente adultonan cu ta vunerabel di salud.
Ta recomenda comunidad pa evita sitionan cu tin aglomeracion di hopi hende prinsipalmente esnan cu tin espacio parti paden. Ta recomenda pa no tin contacto cu personanan cu ta malo cu por tin sintoma di COVID. Laba man frecuentemente cu awa y habon pa 20 seconde. Uza handsenitaizer, Evita di mishi na boca , wowo y nanishi si no a laba man.
Si ta sinti cu tin sintoma di COVID pa porfabor keda paden no sali den hende y haci bo test pa sa si bo tin covid si of no. Si mester haci test lo mester yama dokter di cas y lo cuia e pashent den e proceso of por subi e website di DVG www.dvg.aw pa pidi un test. Si resulta bo ta positivo keda paden isola bo mes pa asina bo no plama esaki.
Tambe ta recomenda pa sali cu tapaboca specialmente na momento cu bo haya bo mes den situacionnan di aglomeracion. E apelacion ta keda pa no warda gobierno bin cu medidanan pa e ora cuminsa cuida nos mes, pero cuminsa cuida awor aki. Vacunacion ta e medio mas efectivo cu nos tin na e momentonan aki pa combati e efecto di COVID.
Pa loke ta trata vacunacion e prome cu e di dos vacuna esnan mayor di edad tin un porsentahe di casi 80% di full Aruba. Sinembargo e di tres shot cu ta e prome boostershot lamentablemente ta mira esnan riba 60 aña solamente 54 % a busca e boostershot, siendo cu cu prome tin un averahe di 90 % di esnan riba 60 aña cu a buske. Esaki ta significa cu e prome boostershot ta na 54% pa esnan riba 60 aña y e grupo aki tin e posibilidad pa haya e di dos boostershot, pero lamentablemente ta solamente 8 % di esnan riba 60 aña a busca e boostershot.
Pa esnan riba 18 aña e porcentahe di e prome boostershot ta apenas 36% . Prome minister Evelyn Wever Croes ta kere cu aki ta caminda cu tin espacio pa nos mehora y proteha nos mes. Por vacuna na DVG durante oranan di trabao di 8:00-12:00 y di 1:00- 4:00 no mester haci cita , pero si ta desea pa yama pa informacion 2800101.
E recomendacion ta keda pa esnan riba 60 aña cu por bay busca e di dos booster haci esaki pa bo mes un proteccion. Di e manera aki nos ta proteha nos mes y ta hunto nos por aumenta e grado di atencion personal cu nos mester tin cada un pa preveni di haya COVID. Berdad no tin hopi hende malo cu ta bay hospital, pero loke cu si ta mira cu si cada biaha e edad ta bira mas jong of e afecta e grupo di mas grandi den nos comunidad e ora Aruba lo por haya su mes den un precion hopi grandi.
Loke ta un realidad ta cu e riesgonan lo bay aumenta cu e cantidad di 701 personanan afecta, pero e lo bay aumenta tambe pa esnan mas vunerabel den nos famia y of esnan cu malesanan cronico cu nos mester por cuida mas.
Ta hopi importante pa para keto un rato y vacuna. COVID lo bay keda Aruba pa un tempo largo ainda , tambe a tuma nota cu tin mas hende ta hayando COVID mas cu un biaha. Hasta esnan cu a vacuna caba tambe ta haya e COVID , pero danki DIOS no cu sintomanan grave debi na e proteccion di e vacuna. Ban cuida nos mes.
