Nos ta den e luna di Juni caba, na mitar di anja 2022. Hopi ya ta corre liher den tempo y a cuminsa pensa riba Pascu y fin di anja, djies pa e alegria, luz y harmonia cu tin den e temporada ey. Nan ta lubida di : “Biba” cada dia, cu wordo regala na nos. Nan ta lubida di goza di nan dia y ta pensa solamente na “Mas oro, majan, si majan mi logra esaki, mi lo ta felis”. Si mi keda cla di paga mi debe di mi auto aki un anja y mey, mi lo por hasi mas cos, pasobra mi lo tin extra placa. Y asina por sigui menciona mil y un motibo cu ta wordo menciona, y, ta lubida di gradici Dios pa e dia regala awe. AWE ta un regalo precioso. Tin cosnan bunita cu nos por hasi cu ta gratis. Un di nan ta, bay pasa dia na beach, goza di nos lamannan, nos dushi naturaleza. Por den fin di siman hunga domino y no tin mester di tin cerves pa bebe tur ora. Pa sinti alegria no tin mester di alcohol. E alegria y paz cu tin cu sali foi den bo paden y refleha den e cosnan bunita rond di bo. Un sonrisa, un abraso, un palabra di danki of con ta bay. Un bishita na bo grandinan. Bebe un koppie koffie na cas, scuchando bunita musica. Yama un amiga na telefoon. Comunicacion. Comunica y duna otro atencion simpel y di curason.
Lady Ruth ta goza e famianan cu ta sinta hunga wega cu nan yuinan, weganan manera Monopoly, Dam y Mens erger je niet , just pa menciona algun. Ki dia tawata e ultimo dia cu bo a bisa bo famia cu bo ta stima nan ? Of bo ta wardando pa Dia di Tata yega pa bo bisa bo tata cu bo ta stime ? Ta bunita pa tin dia di esaki, dia di esaya, pa esnan cu mester di un push pa expresa nan mes, pasobra no ta tur hende a crese den famianan cu ta bisa otro regularmente “Mi ta stima’bo”. Hopi hobennan adulto cu a bira mama, sa esaki, sa e dolor cu nan a wanta pa a hanja un baby, ta realisa e amor di nan mesun mama pa nan hopi biaha y ta bisa nan yuinan cu nan ta stima nan. Derepente nan ta “hasi tur cos pa proteha nan yui of yuinan” no matter what.
Pero no ta bishita nan mesun mayornan, nan mesun welo y welanan, pasobra nan “no tin tempo” ni den fin di siman, ni riba nan dianan liber. Uffffff !!!!.Nan excuus ta cu nan tin hopi trabao. Placa a bira tur cos awendia. Placa, placa, placa ?
Hasta famianan cu tin e placa pa paga un ayudante cuida nan tata of mama cu ta complica y pa nan insoportabel pa cuida, ta core hinka nan den casnan pa nos grandinan. Nan no kier tin e molester ey. Tin biaha , berdad mester di profeshonalnan pa cuida nan. Ta poco tin cu ta sigui lucha cu nan grandinan segun nan capacidadnan, segun nan mesun forsanan financiero, fisico y mental, pasobra no tin placa pa paga pa un ayudante, of no tin lugar ainda pa nan den casnan di anciano. Lady Ruth no kier punta dede riba ningun hende pa tres dede mustra bek ariba dje, pero ta cosnan cu ta pasa. Bunita cu tin tur sorto di fundacionnan pa yuda prohimo rumannan cu no por yuda nan mes pa x motibo. Mi no lo menciona e nomber di e lugar pa anciano, pero algun tempo atras cu un amiga y ami a bay bishita un persona na un di e lugarnan ey, a wak con e cliente den pamper sushi na pupu mester a warda casi 2 ora of mas, prome cu nan a bin pa limpiele bistiele un limpi. Ufffff !! Cu yen di musca bulando rond di dje. No tawata normal.
Na un otro lugar, un cliente a cay foi su stoel y mester a warda un par di ora prome cu nan por a yudele. E persona cu e forsa fisico pa yudele no tawatatei. Shonnan, cu bo ta hopi ocupa of no, nos tur por hinka den nos schedule un crenchi tempo regularmente pa nos grandinan.
Bo ta lubida cu bo tambe, Dios mediante, lo bira grandi y cu bo ta cosecha locual bo ta sembra.
Comprondiendo bida ta un arte ariba su mes. Nos tur ta bon ora nos tin nos salud y por yuda nos mes, pero asina cu tin obstaculonan den diferente forma, nos ta lubida con bon nos tine cu bendicion di Dios semper. Nada riba e mundo ki ta pa semper. Bida ta keda un misterio cu su “ups and downs”. Bida ta un regalo precioso di Dios na cada un di nos, pa nos ta un regalo bek pa Dios .Awe un relato abstracto kizas, pero cu por inspira nos tur ariba nos camindanan den bida. Cu nos libertad den expression. Cu nos curason yen di gradicimento pa cada les, cada experiencia, cada momento. Y…no hasi na un otro, locual bo no kier pa un otro hasi cu bo.
Ban sigui harri un crenchi cu e pelicula “Judeska in da house”. Alegria nos por crea. Tristeza ta bati na porta di mes.
