Orguyosamente Tourism Corporation Bonaire (TCB) ta anunsiá ku riba djaweps 2 di yüni 2022 nan a firma un akuerdo di kolaborashon ku Fundashon Formashon pa Mañan (FORMA).
Komo parti di e Plan pa Rekuperashon di Turismo inklushon di komunidat ta un di e ophetivonan di mas importante. Meta di TCB ta pa amplia e bentahanan ku ta surgi for di desaroyo di turismo, pa asina nan por alkansá un segmento mas ekstenso di Boneiru su poblashon pa medio di eduká i inspirá nos komunidat (komo destinashon inklusivo) i proveé nos poblashon lokal ku e instrumentonan nesesario pa forma parti di e sektor ekonómiko mas grandi di Boneiru.
Ya pa algun aña kaba FORMA ta ofresé e kurso ‘Bonaire In-Depth and Guiding Skills’. E kursista ku logra e sertifikado akí ta proba ku e ta disponé di e konosementu nesesario pa na un manera responsabel aktua komo guia di turista i di otro interesadonan na Boneiru. Meta di TCB ta pa disponé di guianan kualifiká pa salbaguardá kalidat di e produkto i e eksperensia turístiko. Ámbos organisashon ta mira e bentaha di un akuerdo di kolaborashon, ku komo meta pa ofresé bishitantenan di Boneiru un eksperensia inolvidabel.
Ta konsiderá e akuerdo di kolaborashon tambe komo e base pa futuro kolaborashon riba tereno di proyektonan edukativo i sosial. Den futuro FORMA i TCB lo sigui investigá i realisá un variedat di aktividat pa duna treinen i kurso na personanan ku ta traha den sektor turístiko, pa di e manera ei realisá e metanan ku ta deskribí den e Plan Maestro Stratégiko pa Turismo (Strategic Tourism Master Plan) i e Plan di Rekuperashon di Turismo (Tourism Recovery Plan).
