Marcelino Mauricio a risibí kondekorashon Real for di mannan di Gezaghebber Edison Rijna.
Ta un muestra di gratitut pa su dedikashonnan.
Marcelino a risibí formashon den trabou Sosial Ayudo Transkultural. Ela traha den kuido di hende grandi, kuido terminal, GGD, kuido di hóben, kuido di adikshon I pa hustisia tantu na Kòrsou komo na Hulanda. Dosente free lance na formashonnan na enfermea I enfermero I formashon agógiko I instructor na milisia Antiano na Kòrsou.
Desde aña 2010 na nòmber di Servisio Institutonan Hudisial dekorándùs ta instruktor riba tereno di dunamentu di kuido na adiktonan dentro di Instituto Hudisial Hulanda Karibense (JICN). Mas aleu vários biaha for di e anterior Antia Hulandes a manda dekorándùs Hulanda relashoná ku promoshon di ekspertisio serka organisashonnan ku ta traha ku e grupo di enfoke antiano na Hulanda.
Na aña 2009 for di Kòrsou dekorándùs a biaha pa Boneiru kaminda den e funshon di direktor el a kontribuí na lantamentu di Fundashon Kuido di Adikshon Boneiru (Stichting Verslavingszorg Bonaire). Esaki tabata e predesesor di Fundashon Mental Health Caribbean (MHC) ku nan a lanta na aña 2012. E fundashon akí, kaminda te 1 di novèmber 2021 dekorándùs a desempeñá e funshon di mènedjer insular / direktor interino, ta ofresé kuido di salú mental na habitantenan di Hulanda Karibense. Dekorándùs a dediká su mes na realisashon di kuido i tratamentu adekuá di hende ku problema di salú mental. Banda di esaki dekorándùs a hasi hopi esfuerso pa kibra e tabú ku ta eksistí relashoná ku adikshon i enfermedatnan sikiátriko. El a organisá e lasonan di kolaborashon entre nos islanan i paisnan i e diferente institutonan. Hopi biaha nan ta pidi dekorándùs su konseho, organisashonnan na Aruba i Kòrsou tambe ta hasi esaki i nan ta mir’é komo ehèmpel pa e otro partnernan (di kadena). E dedikashon di dekorándùs a aportá na mas akseptashon i na mehorashon di kalidat di bida di pashèntnan i adiktonan. Banda di esaki e dedikashon di dekorándùs a kondusí tambe na e echo ku MHC por a desaroyá su mes i bira un organisashon profeshonal ku ta para meimei den nos komunidat.
Dekorándùs a komprometé su mes tambe ku kombatimentu di pobresa. E ta pidi atenshon pa e problema akí, parti kuminda i artíkulonan di promé nesesidat i ta sali na defensa di interes di personanan indokumentá i víktimanan di violensia doméstiko. Dekorándus su pashon ta pa invertí den komunidat boneriano di manera ku Boneiru por krese. Su dedikashon inkansabel pa personanan di ménos rekurso ta atmirabel. E ta preokupá pa nan i kontinuamente e ta purba haña solushonnan pa minimalisá pobresa na Boneiru. Pafó di su oranan di trabou por haña dekorándùs serka hóbennan i adiktonan pa hiba kuminda pa nan, duna nan atenshon òf pa ‘coach’ i motivá nan. Dekorándùs ta aktivo tambe riba tereno di deporte komo entre otro miembro di direktiva, boluntario pa klup di futbòl i entrenadó/coach di diferente tim hubenil. Banda di esaki e ta yuda hóbennan tambe pa keda riba e kaminda korekto i no dirigí nan talentonan solamente riba futbòl. Dekorándùs ta dediká su mes na vários aktividat sosial sekundario, ku ta na bienestar di nos komunidat. Dekorándùs tin un aktitut positivo i kontinuamente e ta asumí un ròl di ehèmpel den nos komunidat boneriano.
Dekorándùs a duna un kontribushon importante na desaroyo i profeshonalisashon di kuido di salú mental i kuido di adikshon na Hulanda Karibense. Por papia di méritonan spesial personal den i relatá na e funshon prinsipal.
Mester bisa ta èksistí e opshon pa por skohe pa risibí un kondekorashon durante okashon general huntu ku otro dekorandùsnan ò por skohe pa un okashon partikular. E echo ku dekorandùs tabata atentiendo un simposio den kuadro di dies aña di MHC, esun ku a proponé a bini ku e buniita idea pa sorpres’é durante e okashon aki.
Mirando tur e lokualnan dekorandùs a hasi su Mahestat Rei Willem Alexander a nombra Marcelino Mauricio komo Ridder in de Orde van Oranje Nassau”
Gezaghebber na e okashon aki a felisitá dekorandùs ku e bunita logro aki
