Mi persona Edison Ellis, miembro di frakshon di MPB den Konseho Insular por a tuma nota di e lamento di e frakshon di Demokrat den Konseho Insular di Boneiru pa loke ta trata e desishon ku e dos partidonan den gobernashon a tuma pa eliminá e ‘Komishon di Covid-19’ i ku esaki ta un desishon polítiko hustamente pasobra sr. Abraham ta presidente di e komishon. Mi ta reakshoná pa mustra ku e komishon akí tabata èkstra ordinario i ad hoc pues temporal pa atendé asuntu di Covid den Konseho Insular. Pues si Covid-19 a baha na Boneiru no tin motibu mas pa sigui ku e komishon akí i ku tin otro forma pa atendé ku e asuntu di Covid.
‘Komishon di Covid-19’ su karakter i historia
Ta bon pa refreská frakshon di Demokrat su memoria i mustra riba e moshon di 24 di sèptèmber 2020 pa lanta un komishon èkstra ordinario di konseho insular ad hoc di ‘Maneho di Covid-19’. E moshon a keda aseptá unanimamente i un dekreto di konseho insular a keda kompilá i dekretá dia 27 di òktóber 2020. Na promé lugá mi kier a mustra riba e palabra ad hoc. E palabra ad hoc ta nifiká ku a lanta e komishon speshalmente pa Covid-19 so. A lanta e komishon pasobra segun e moshon no tabatin suministro di informashon optimal i informashon ta esensial pa por duna direkshon supstansiá riba kualke área di maneho na un manera responsabel. Na di dos lugá e palabranan ‘ad hoc’ i ‘èkstra ordinario’ ku e komishon a haña ta nifiká un karakter temporal. Pues si no tin asuntu di Covid mas, outomátikamente e komishon mester keda eleminá i atendé loke kualke punto di Covid komo kaso di Kuido di Salubridat.
Hustamente mirá e komishon su meta tabata ta segun e dekreto pa trata tur e medidanan di Covid-19 na un manera strukturá i efisiente. Meta di un komishon segun artíkulo 117 di nos WolBES ta pa prepará desishonnan di konseho insular i Konseho Insular al final ta tuma e desishon. Un komishon pues no tin nada di bisa òf disidí pero ta prepará tur desishon i ta manda esaki pa Konseho Insular. Ta straño ku frakshon di Demokrat no sa esaki.
Koriendo den e lista di desishon di e komishon mi por a tuma nota ku den e total di 12 di e reunionnan e komishon no a hasi ningun rekomendashon pa Konseho Insular tuma un desishon. Tabata reuní solamente pa interogá gezaghèber i e diputadonan kada bes ku un medida di emergensia a drenta na vigor. Pa kolmo e responsabilidat pa kombatí e pandemia òf kualke pandemia ta den man di e gobièrnu di Hulanda i no di Kolegio Ehekutivo ni tampoko Konseho Insular. Tur e topikonan ku a keda tratá bon mirá por a keda tratá den e komishon fiho di Komunidat i Kuido pasobra e servisio di salubridat púbiko ta kai bou di e direktorado akí anto porsierto nan a hasi un bon trabou. Ta pesei mes tópikonan relatá na Covid 19 den e era nobo, laga nos bisa asina lo keda tratá den e komishon fiho di Komunidat i Kuido i ta pesei mes e komishon di Covid 19 a keda eleminá mirando ku e tabata un komishon ad hoc, i temporal i su tempu a pasa.
For di Historia
Mester menshoná ku un artíkulo den Èkstra dia 20 di òktober 2020 lider di frakshon di Demokrat, sr. Abraham a laga sa ku tin falta di komprondementu den pueblo, loke segun e ta krea deskonfiansa. Na sierto momentu pueblo lo no por karga e maneho. Ta e argumento aki a uza pa fòrsa un komishon èkstra ordinario i konseho insular. A duna sr. Abraham benifisio di duda i hasta a hasi su persona presidente di e ‘komishon di Covid 19’.
Komishon fiho di Komunidat i Kuido pa Konseho Insular
Por último mi kier a mustra sr. Abraham riba e konferensia di prensa ku gezaghèber a tene for di kuminsamentu di mart kaminda a keda anunsiá ku kasi tur medida pa loke ta trata Covid 19 a keda barí for di mesa ku eksepshon pa loke ta trata biaheronan pa Boneiru. Pues e ‘Komishon di Covid-19’ no tin nada mas pa reuní ariba, pasobra tur medida a keda práktikamente eleminá. No a keda konseho insular nada otro mas di eleminá e komishon ku porsierto tabata di índole temporal.
Mi ta ripití: komo parti di e proseso di rekuperashon di Covid 19 i pa restorá konfiansa riba nos isla, e komishon èkstra ordinario di konseho insular ad hoc di ‘Maneho di Covid -19’ a keda eleminá i ‘komishon fiho di Komunidat i Kuido’ presidí pa Dokter Esther Bernabela lo sigui guia reunionnan enkuanto Covid 19.
